› 選擇地區
三藩市
紐約
洛杉磯
其他美國地區
香港 台灣 北美
 
2010年06月18日

球迷去南非 - 左丁山

投資M日日夜夜睇世界盃,早已訂好門票、酒店、機票,會到南非觀賞七月七日及七月八日之四強準決賽。點解唔睇埋決賽?投資M話另有安排,唔可以淨係掛住在南非現場睇波喎。
未去南非,已經見到好多南非治安差差差嘅報導,外國記者、球員、訪客住在世界盃指定酒店內,如留在房間,有人持槍入門行劫;如出外,有人入門偷走十萬美元器材;有人坐車出外,斑馬線前有人持槍兇嚇搶錢;有人把錢放在酒店夾萬,同樣不翼而飛,酒店話唔負責任,唉,即係無論在甚麼環境,南非賊人照樣明刀明槍嚟搶、偷、劫,問你點避?中國國家旅遊局因當地發生多起打劫華人事件,已為南非發出旅遊警告,唔知香港特區政府會唔會跟風呢?
投資M話去到南非,會隨時袋住一千美元,一旦遇劫,立即付上買路錢,絕不反抗。如果遇劫兩至三次,用錢好和味噃,投資M果然係狂熱球迷,先至肯甘心如此。投資M反問:「你都係球迷啫,點解從來唔去現場睇世界盃?唔好話畀我聽你冇錢!」
真係要去,挖啲錢出嚟都得嘅,但自己從來唔鍾意趁墟,對大規模群眾聚集嘅地方,越係想避開,咪搞我,一想起人多爭廁所,爭搭車,諗吓都驚。小YY在一九九九年十二月三十一日千禧年晨早與同學朋友前往紐約時代廣場參加「千禧倒數」,由中午企到半夜,足足十二小時,以後提起都怕;最近有朋友組織旅遊團去睇世博,聽到每日有四五十萬人入世博園,諗起都驚,仲係猶豫未決之中。入場睇世界盃?真係未諗過。自己又唔係大人物,你估係基辛格咩,佢逢有世界盃,必定到場觀看準決賽及決賽,享受特別招待,好似佢咁嘅超級球迷,自己發夢都發唔到。基辛格睇好巴西、德國,你又認為點?
過去十八屆世界盃,巴西贏五次,意大利贏四次,西德贏三次,烏拉圭贏兩次,阿根廷贏兩次,剩番兩次由英格蘭、法國奪標,巴意德三隊佔咗三分之二,加埋阿根廷就佔咗87.5%,睇歷史數據,呢四隊玩晒,其餘只係陪跑,睇吓西班牙可唔可以突圍而出!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載