› 選擇地區
三藩市
紐約
洛杉磯
其他美國地區
香港 台灣 北美
 
2010年06月20日

噪音喇叭 - 左丁山

寫稿之時,聽緊UncleRay節目重播舊歌,賓架P打電話嚟,談話之間,畀佢聽到,於是叫左丁山買隻新CD,叫做《UncleRay101》,好懷舊,好好聽喎。於是即刻去買,原來內有六隻CD,收錄香港本土歌星嘅舊歌,第一隻就係方逸華嘅〈長在我心上〉,其他名人有潘迪華、DannyDiaz、葉麗儀、詹小屏,許冠傑、鍾玲玲、區瑞強、陳懿德、杜麗莎、鄧寄塵、黎愛連、泰迪羅賓、溫拿樂隊、李振輝、林子祥、TheFabulousEchoes等等等,數都數唔晒,香港五十幾年來之流行音樂,盡由此發韌。
UncleRay可能係全世界年紀最大嘅電台DJ,左丁山聽歌學英文,由細聽到大,歷久不疲,今天之八十後,如欲聽歌學英文,不妨試吓。好似UncleRay呢類人物,昔日港英時代,一定可以獲頒勳,故此早已領得MBE,好在特區政府都識做,頒個BBS俾佢。有呢位老人家在,邊個敢膽話香港冇音樂文化?
近日睇世界盃,睇到現場好多噪音,十分刺耳,皆因當地球迷猛吹南非喇叭vuvuzela,吵鬧異常。外電話呢隻喇叭在英國家十分暢銷,下屆英超聯賽球場可能嘈到飛起,其他人可能有唔同意見,左丁山就唔係幾欣賞啫,咁鬼嘈,除咗騷擾場上球員之外,球迷都會頂唔順。點睇都係唱歌更有文化,例如利物浦球迷齊聲高唱〈You'llNeverWalkAlone〉,更加振奮人心,可收鼓勵球員勇猛作戰之用,吹魔鬼喇叭喎,美斯、C朗等球星難保不會心煩意亂。
魔鬼喇叭會否引入香港?如果啲維園阿伯、阿哥在城市論壇外每逢聽到自己唔鍾意嘅講話就齊齊吹,香港電台多得佢唔少。環保局不妨未雨綢繆,即刻為南非魔鬼喇叭嘅聲音量度分貝,做足工夫,以應付他日市民投訴,例如在大球場比賽,有魔鬼喇叭聲響起,附近居民會唔會投訴呀?不過遲早香港警察嘅耳朵會更受難,上街示威分子隨時會吹起魔鬼喇叭,嘈死啲警察與保安,到時候大家就會好懷念李明逵播放貝多芬o架嘞!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載