› 選擇地區
三藩市
紐約
洛杉磯
其他美國地區
香港 台灣 北美
 
2010年07月02日

走曲線易入歧途 - 左丁山

中貿林在中午飯局,問左丁山知唔知道甚麼是24,776名,幾乎俾佢考起,飲啖茶,諗真吓,好似有啲印象噃,似乎曾在《蘋果日報》見過。中貿林再講:「中文大學收內地學生收到第24,776名呀,人哋話中文大學係不入流學校呀!」
哦,咁就醒起嘞。人講佢又信,唔似做慣中國貿易啫,做中貿之人,知道最多內地新聞,點會明知亂講嘅傳聞都會半信半疑o架。六月廿七日〈名采〉副刊有高慧然「隨遇而安」專欄講「曲線入中大」,引述內地讀者之言,指佢嘅仔考試在全省排名24,776名,只能報讀「不入流大學」,剛好達到香港中文大學在大陸招生的分數要求,故此決定報讀中大,所以高慧然話希望子女入中大嘅家長,不妨走曲線移居大陸讀中學,以大陸學生身份報讀。
大陸讀者當然對報讀中大完全不了解。中大在內地招生係參加全國統招嘅,成績差少少都唔使填報。去年中大招收內地新生約三百名,百分之九十三嘅高考成績,在佢哋所屬省份,皆排名在前五百名。考到第24,776名喎,如果家有一百萬元嘅(如高慧然提及),不妨考慮去外國之私立野雞大學報讀,唔知邊啲係,可以問吓DavidWebb。
內地生來香港讀書四年,未必要使一百萬,五六十萬就差唔多。香港家長想話曲線入香港嘅大學,千祈唔好叫子女到大陸讀中學(除非佢哋好叻)。《南華早報》早有報導,一啲有錢家長送子女到英國讀私立寄宿學校,考GCSE高級程度,再以考試成績申請入香港大學或其他大學。英國高考程度較低,攞A比較容易,考到四A五A者,大有人在,《南華早報》就訪問咗一位在英國高考得四科A透過Non-JUPAS而入咗港大經濟金融學院嘅學生。但不可不知,香港高級程度高過英國,好多時,一個英國A被視作一個香港B,左丁山幾年前代朋友詢問,就俾一位著名教授點醒咗呢樣嘢:英國高考水平下滑,分數上升,香港不會全盤照收!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載