› 選擇地區
三藩市
紐約
洛杉磯
其他美國地區
香港 台灣 北美
 
2010年08月09日

會考兩故事 - 左丁山

末代會考落幕,明年二○一一還有一次依據舊課程嘅會考,但只准自修生補考,讓一啲學生可以有機會補考番一兩科,尤其是中、英文,今年失手嘅科目。到咗二○一二年,就係第一屆中學文憑試。考評局秘書長張永明認為文憑試已得到世界主要國家教育當局嘅承認,考生以文憑試成績申請世界名校如哈佛耶魯、牛津劍橋,絕無問題。家長學生毋須被所謂升學專家誤導。
每年會考,都有一啲特別故事,名人子女之成績,不算特別故事,報紙報導一啲名人子女考得好好,其實亦有不少名人子女考到一頭煙。以今年嘅會考故事嚟講,左丁山認為有兩個值得一談。
(一)兩位新移民學生,一富一窮,各有遭遇,一位尹靖詩小姐來自風采中學,考到8A,父母兩年前投資六百五十萬元,移民來港,為的是香港教育。尹靖詩插班中四,迅即適應,而且每個月用一萬元補習英語,加上自己勤力,成為尖子,此乃富家女考試成功之路。另一位係窮家女陳淑君,來自上海基層,父母為咗香港教育,三年前以單程證形式,送女兒到港,寄居親戚家中,親戚要佢做家務,不時幫表弟妹補習,待親戚上床後先至有時間坐在床上溫習功課。會考前,媽媽來港打氣,發覺親戚呼喝,於是帶女離開,無宿可寄,幸得校長區月晶(將軍澳仁濟醫院王華湘中學校長)援手,找到一位同學家長收留,不收租金,淑君爭氣做人,考到3A3B,可見清貧子弟,只要努力向上,勤奮好學,一樣有好成績。陳淑君故事,似足粵語片版本。
(二)觀塘福建中學女生陳嘉盈考到7A2B,夢想修讀天文學,但母親堅決反對,認為讀商科可以到銀行工作,薪高糧準,讀天文學可能望天打卦。哎吔,香港大學理學院院長郭新教授係世界天文學權威,出身培正中學,係明尼蘇達大學物理學博士。香港難得有尖子願意讀天文學,如果我負責港大理學院收生,一定會第一時間打電話搵陳同學,邀請佢入港大。讀完物理天文,理想工作就係入天文台,一樣薪高糧準啫。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載