› 選擇地區
三藩市
紐約
洛杉磯
其他美國地區
香港 台灣 北美
 
2010年09月14日

中學殺校或縮班 - 左丁山

九月十日原來係內地嘅「敬師節」,亦係香港嘅「敬師日」。內地教師薪水似乎遠遠低於香港,但置家於珠海及中山嘅分析師H話俾左丁山聽,內地教師甚為富有,過時過節就收禮收到手軟,在富庶地區如珠三角嘅老師,更加發財。以前鄉村老師收禮,只係一隻雞及若干食品之類,村民以示敬重老師之意啫,點似得今天中國富起來了,家長送禮以一千元禮券為最低單位?睇愛國報紙報道,方知內地家長不敢不送禮,否則考試時,考前三名竟然會變成包尾三名!學生自幼耳濡目染,小學已識得行賄係乜嘢一回事,大個咗豈不有樣學樣,視黃光裕、賴昌星為偶像吖。
內地教師在教師節喜氣洋洋,猛數禮券,本地中學教師在教師日可能愁眉苦臉,恐怕殺校,職位不保。教協、教聯等等教師組織籌組反殺校聯盟,要求統一縮班,實行中學教師有難同當。中學點解可能會殺校?睇吓下列數字就知。
今年升中一嘅學生,就係04/05年嘅小一學生,即是1999出生嘅嬰兒,有50,513名,而之前幾年,由1996至1998,分別有64,599、60,379、53,356名,即係中一學生逐年遞減,之後四年仲弊,由2000至2003年嘅出生嬰兒,分別為53,720、49,144、48,119、47,687名,以後嘅中一生仲會更少。當然出生數字不等於在本港就讀學生嘅數字,但睇番中學生人數,在00/01年達到高峯嘅494,000人,02/03年開始下降,至到08/09年,只得369,000人,香港人唔肯生細路,對學校嘅影響,家充分顯現。

我地以前讀書,每班最少有四十人,現在聽講係三十幾名。據教育界人士講,教育局目前會批准中學收中一生嘅最低數目係四班或九十一人,即平均每班二十三人,此乃形勢使然,學生不夠,無奈何。以後可能會下降到三班六十一人。
依照現時編制,殺校豈非必然?聽講教育局會在本星期要求全港中學提交中一學生實數,點數清楚之後就會宣佈新方案,相信不外乎(一)收生少於六十一名嘅學校危危乎,(二)搞平均主義,叫名校捱義氣,縮班,等同區嘅學校接受剩餘學生,(三)暫時乜都唔做,等各校吊吓鹽水先,每個方案都會有人反對嘅,例如教師鍾意第二方案,家長多數會反對!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載