› 選擇地區
三藩市
紐約
洛杉磯
其他美國地區
香港 台灣 北美
 
2010年10月06日

誘因不可少 - 左丁山

一位讀者陳小姐來電郵問:「本科生」與其他學生有甚麼分別。本科生就係英文Undergraduate嘅翻譯,英文意思係讀緊大學而未得到學位嘅學生,在美國就係一至四年級學生啦,在現時香港與英國,就係一至三年級生,好簡單啫。以前香港大學學生用英語寫稿嘅年代,學生報嘅中文名字係「學苑」,英文名字就係Undergrad。在陳婉瑩、吳靄儀、詹德隆、宋恩榮、許仕仁搞學生報、學生會時期,《學苑》在中環報攤出售,雖然銷量不多,已是大名鼎鼎。

今日中環報攤,邊度會有學生報呀,八卦娛樂周刊就最多,呢日在報攤買馬經,碰到行過嘅電器零售要員,滿面笑容,問佢係唔係好好景?佢話:「托賴啦,世界盃帶旺新嘅高清電視零售,新數碼相機好好賣,iPhone,iPad更加搶手,今年真係幾好。」未來又如何呢?要員說:「有希望o架,有韓國電子產品商招待我地去法蘭克福睇新產品展,開咗眼界,明天會更好。」咁鬼樂觀,係唔係歐遊之時,受落晒呀?要員話:「騎騎,三十年河東,三十年河西,聽我嘅師傅話,八十年代,日本電器電子商招待豪華,到日本任飲任食。到咗二十一世紀,日本人好難o架嘞,唔願使錢,反而日本人嘅徒弟已經追過師傅,今次韓國電器商好好招呼,頭等機票來回,到巴黎食三星餐廳嘅法國餐,望向窗外欣賞鐵塔風景,後來我地問吓,每位餐費價要九百歐元o架!」嘩,唔得掂,韓國人咁大手筆,唔怪得家行入電器行,韓國牌子每每擺在最當眼嘅位置,一啲日本牌子就放在後面,買家要行多幾步先至見得到。零售商賣貨最講incentives,泛指現金回贈、佣金,其他費用等等。售貨員推貨,永遠首先猛sell佣金最高嘅產品,如果買家係要買一隻佣金低嘅牌子,售貨員分分鐘唱衰嗰隻牌子㖭,你估會講交情人情嘅咩。以前有一張報紙廣告部只發基本薪水,不設佣金制,出售股權後,新主立即下令改變,佣金掛帥,該報嘅廣告頁數立即大增,有人以為好神奇,其實係新人依照市場原則辦事而已。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載