蘋果日報 | APPLE DAILY
› 選擇地區
三藩市
紐約
洛杉磯
其他美國地區
2010年12月22日
馬上成為壹會員

火速救兵 - 左丁山

廣播處長一職,因黃華麒做到病,塞咗三條血管,要入醫院通波仔,故此決定不續約而懸空。十二月十七日此職位正式向全世界招聘,有意者大可申請。此職不限年齡,不限於大學畢業,理論上有大把人有資格,但以左丁山之職場經驗,真係要寫信求職應徵呢類高職嘅,多數冇乜機會,要有獵頭族打電話嚟相約面談,請你應徵,咁就有幾分光嘞。
負責篩選及邀請應徵者嘅獵頭公司就係Korn/Ferry,主持人AndrewTsui已有三十年獵頭經驗,等閒人物佢唔會睇上眼,想做廣播處長呀,講掂安德魯先。有一位頑皮友叫左丁山去應徵,幾乎俾佢嚇死。入到港台,對住一班唔可以炒嘅公僕,滿腦子港台文化,點先至點得佢地郁呀,隨時會俾佢地點番轉頭,搞到頭昏腦脹,能夠通波仔行番出嚟,已算夠運!
港台文化之一係拍電影式劇集,十分認真,與一般肥皂劇不同貨色。左丁山親戚之中,有人在消防處任職,最近提醒每逢星期三在無綫翡翠台下午七時有「火速救兵」片集,由港台電視部製作,一共有八集,今晚就播第三集「高溫任務」。防火救火電影,荷里活拍過唔少,大都十分緊張,本港電視台亦有拍過,加插一啲情侶故事,真實性成疑。港台嘅防火救火劇集有咩唔同呢?公僕鄭惠芳(高級監製)周圍講,「火速救兵」拍攝前立下兩大原則:(一)要有真實感,因為與消防處合作,支援、資料、情節、對白方面都有真人真事為編劇基礎,拍攝時,有消防官跟場指導,(二)劇集講感情,不涉及男女私情,但發掘家人同袍之間的感情掙扎、矛盾。
今晚呢集「高溫任務」在油麻地廟街拍攝五級大火,商廈、住客積極支持,得以順利完成。左丁山最近與一位消防總長見過面,就問過佢如果有沖天大火災,香港消防如何勝過上海消防?總長答得好技巧,話不可以評論上海,跟住就講到防火勝於救火,香港防火第一靠安全制度,靠消防條例,第二先至靠火燭車,因為任何雲梯都上唔到三四十樓,防火制度遠勝雲梯也!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載