› 選擇地區
三藩市
紐約
洛杉磯
其他美國地區
香港 台灣 北美
 
2011年04月28日

大橋難產 - 左丁山

復活節假期留港消費,工程A一家人約飲茶,聞說皇朝會不久前廚房換人,點心有啲新意,於是一行十數人就到皇朝會飲午茶,粵菜廳內果然座無虛席,點心夠多,上枱夠快,與一般會所完全不同,我哋好耐冇去過皇朝會咯,白交會費多年,適逢五月份上海總會餐廳大裝修,整個五月停業,可以去多啲皇朝會,轉吓口味。
皇朝會有個無敵景,就係遠眺中環海旁,天朗氣清之日,可以望到昂船洲大橋。於是諗起港珠澳大橋受阻於法院判決,問工程A怎麼辦?佢話:「成個工程建築界都覺得無可奈何,港珠澳大橋香港段必受延誤,造價唔急升先至奇。」咦,有報導話特區政府會採用最新海堤建築方式建造人造島,可以省回四個月建築時間噃,咁又得唔得呢?工程A話:「時間即是金錢,追四個月工程進度,梗係用錢嚟買時間啦。世界上能用最新方法毋須挖泥嘅公司,十隻手指數晒,半數係日本公司,香港冇份,日本公司有高達一百米嘅機械,但因為人造島在機場跑道尾部,建造時機械不能超過五十米高,故此日本機唔可以用,點搞好?可以削減高度嚟就番香港嘅,要時間囉!六個月啩!如此一來,投標時只有日本韓國公司敢落標,而韓國公司有青馬大橋劈炮前科,即係話只有日本公司可用,仲會便宜俾你?而且日本311後,百廢待興,點知人地鍾唔鍾意嚟香港接工程呀!」
聽完工程A一輪嘴之後,左丁山唯有苦笑,港珠澳大橋經中央拍板,絕不能停,偏偏有環保人士與公民黨聯手在背後有動作,香港納稅人隨時要準備多幾十億元作超額開支用途。聽另一位工程界人士講,特區政府初定五月十三日為港珠澳大橋工程投標截標,但在法院判案,一切變得不明朗,冇任何一間建築公司膽敢貿然落標,外國基建公司會袖手旁觀,睇吓政府如何將「環評合法化」先,現時無人講得出條大橋工程(港段)最後嘅造價會係幾多,總之有戲睇!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載