› 選擇地區
三藩市
紐約
洛杉磯
其他美國地區
香港 台灣 北美
 
2011年06月04日

以下犯上多 - 左丁山

眨吓眼,今年已是六四二十二周年,當年出世嘅嬰孩,今年已係大學畢業之齡,學生Y就係其中之一,當日佢阿媽挺着大肚皮上街遊行,點會諗到時間過得咁快呀。從統治者觀點而言,六四係以下犯上,以新顛覆舊,以年青向年老作反,最後決定鎮壓之。依家係二十一世紀嘞,從去年開始,北非中東(最注重權威嘅地區)捲起一陣以下犯上之風,街頭示威變成街頭革命,老牌統治者竟被掃走,影響所及,中國名曲「茉莉花」竟成為禁忌,是否異數?
一位高人話:「唔係噃,此乃天意」。大師兄森哥在五月三十日叫左丁山去鏞記食飯,見吓佢嘅師妹鍾月萍(LilyChung)博士。鍾博士係崇基六二年史地系畢業生,今年七十過外咯,講說話仲大聲過左丁山,佢畢業後去明尼蘇達大學攻讀地理學博士,曾在賓州州立大學、香港浸會書院、中文大學、三藩市市立大學做地理學講師,退休後居於三藩市市郊,精研易經、命理,最近香港天地圖書為佢出版一本新書「長勝風水─易經的突破」(英文版在亞馬遜網站有售),故此鍾博士特回港一行,佢話讀德明中學時,曾與同學到石板街鏞記飯店吃燒鵝,那已是五十年代之事咯,五十幾年之後重到鏞記,自然一切都感覺唔同。
森哥話喺五月廿一日,鍾博士在灣仔天地圖書發佈新書,大廳坐滿人聽佢講易經,跟住在今天六月四日下午兩點至三點,在九龍灣MegaBox大眾書局開講「河洛理數命理」,聽講費每位收四百八十元。六月九號就返回三藩市灣區,咦,仲唔趁機會問幾句?鍾博士話自一九八四年起六十年大運(至二○四四)行鼎卦,○四至一四呢十年行「未濟卦」,未濟代表試驗期,事情有待完成,故此呢十年間不少新事物湧現,五花八門,但未必可以持久,好多嘢有待修正,總結卦象係始亂終吉,實驗會成功,其中經歷不少以下犯上之事情,要有高人指點、指導先至可以避過禍患。實際上係點呀?鍾博士話:「呢幾年間有不少詐騙、出術,以假當真嘅行為,切記要係真正老實嘅專家,先至不為所動,不致跌入漩渦。世界盛行以下犯上,以少欺老,以新鮮衝擊老一套。識變通嘅老實人有得益,迎風擺柳嘅聰明人必受淘汰!未來三十年會淘汰好多聰明人,天下亂事不止,你要切記!」

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載