› 選擇地區
三藩市
紐約
洛杉磯
其他美國地區
香港 台灣 北美
 
2011年07月26日

擴大醫療業 - 左丁山

香港人口老化,係不可改寫嘅事實,香港嘅富翁特多(指擁有一億流動資產以上人士,唔係甚麼百萬富翁)亦係越來越多,所以保健產品、保健方法、保健理論大行其道,富翁每年有晒醫療保險,亦有保健專家做身體顧問,每年十零萬保健費(包括保健維他命),閒事啦。
普通人買醫療保險,已算滿足,食物及衞生局推動自願醫療保險制,要到2015年先至有可能實行──假如一切順利,再無議員、政黨反對嘅話;實現呢個制度,要有三方面配合:(一)擴充,增加醫院,政府話已經策劃緊,未來會有四間醫院落成,點解要多啲醫院?大家睇新聞就知道啦,全港醫院已經常滿,不能不增加數量;(二)增加醫院醫療設備,譬如在公立醫院輪候MRT(核磁共振)要等八十六日,政府要撥款買多啲。但公立醫院已用盡每一吋地方,購入新儀器都唔知擺去邊。汕頭大學醫院近月引入最新檢查儀器;有心人想話捐同一款式嘅儀器畀香港,點知香港公立醫院冇地方容納,想要都唔得,故此要達致第二個目標,先要做到第一項;(三)有新醫院,新設施,有冇人呀?醫生、護士、治療師、醫療儀器技師夠唔夠呀?答案係全部唔夠,各方面急如螞蟻,政府將成立委員會檢討人才問題,不排除引入外來醫生。
講到輸入醫生,醫療界就神經緊張,尤其是今年明年係選舉年,政治壓力甚大,舉個例,明年選特首由一千二百名選委投票,而選委就係今年選出嘅,反對輸入醫生嘅組織,好有可能除咗口頭、書面反對之外,仲會派人選選委,得咗咯喎,有票在手,明年嘅特首候選人點都要洗耳恭聽佢地嘅意見啦,不敢推行輸入醫生嘅政策啦。贊成輸入醫生嘅人士,唔諗埋政治呢瓣,多數會輸。一位政府醫生感嘆,新加坡與香港面對同樣情況,人地已大力輸入外國醫生(英聯邦醫生為主),香港話要發展醫療優勢產業,連人手都唔夠,點同人爭呀!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載