› 選擇地區
三藩市
紐約
洛杉磯
其他美國地區
香港 台灣 北美
 
2011年08月30日

津貼工藝品 - 左丁山

拜完四面佛就過馬路到「洲際酒店」隔鄰之泰國國營工藝品公司NaraiPhand,此店面積甚廣,內裏只有店員,人客只有我地六個,我地行咗一輪,只係買鱷魚皮帶,四五個店員招呼,禮貌周到,我地啲港燦在港旅遊區購物係二等人,店員睬晒啲上流顧客內地同胞,但係來到曼谷,就有資格享受吓店員嘅一級招呼!NaraiPhand好彩係國營,賺蝕冇計,如係私人企業,老早執咗笠。學生H問點解,左丁山話:「此乃納稅人津貼,用以扶持泰國傳統手工藝技術嘅,如果冇咗NaraiPhand,恐怕不少手工藝會失傳咯!」
來此並非旨在購物,帶學生嚟睇吓,算係少少文化旅遊;唔好淨係在Emporium、SiamParagon、MBK等大商場睇到香港有、新加坡有、吉隆坡有,個個大城市都有嘅現代產品、時裝及快餐連鎖店。
走出NaraiPhand,已近中午,於是上的士去湄南河畔之香格里拉酒店,內有著名中菜廳「香宮」(ShangPalace),係曼谷有錢人家喜歡之粵菜名店,來此吃幾件點心,食隻乳鴿(勝過甚麼沙田乳鴿多多聲),甜品就叫貨真價實嘅椰皇燕窩(唔通在香港食咩!),沙田陳太見到,嘩一聲:「乜咁多燕窩㗎!」最緊要吃得開心,貴賓房內,一個泰國人家庭十幾人吃到杯盤狼藉,都唔知幾高興,隔籬枱就有一對日本男女默默無言咁享受脆皮鴨,點解日本人可以食幾個字都唔出一句聲嘅呢?我地廣東人真係難以明白。(回港後在舊中國銀行大廈十二樓之Cipriani吃晚餐,呢度嘅羊架與Zanotti相差甚遠,最弊隔籬枱之六位八十後,四男二女,大聲講,大聲笑,嘈到三個墟咁,侍應不敢勸止,令人頭痛,一啲香港人就係嘈到不能自制嘅!)

香格里拉酒店在河邊,碼頭之外有一大群鮎魚,體積龐大,平時潛游於混濁黃泥色河水下,岸上人睇唔見,一位侍應在河邊咖啡室執枱,順手將一小塊麪包拋落河,幾十條大鮎魚即時現身爭吃麪包,後來侍應俾咗一盤廚餘麪包我地,用來餵魚,大群鮎魚爭吃,捲起小型「河水浪」,遊客爭住影相,左丁山掛住睇,將NaraiPhand之紙袋(內載鱷魚皮帶)放在椅上,咁就忘記了……

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載