› 選擇地區
三藩市
紐約
洛杉磯
其他美國地區
香港 台灣 北美
 
2011年09月24日

並無三不賣 - 左丁山

特區政府雖然口硬,話會維持土地供應,令樓價穩定,但今年之定期賣地,突然間改為暗標投地,其中有何玄機?大部分人士都認為係托市行動,經過兩次拍賣成績一般,氣氛麻麻之後,特區政府即刻驚咗,要以投標代替公開拍賣,或者政府最終收到嘅地價會保持不變,但公眾會因此而失去知情權,不知地產商如何出價,競投是否踴躍,中標價與二標價相差幾大等等,事實上就係遮遮掩掩!公開拍賣在香港已成地產文化一部分,人人習慣,特區政府如果唔係驚住拍賣過程影響到樓價下跌嘅話,何必要取消,以投標代替之?話唔係托市喎,無論講到幾大聲,公眾不能無疑!
香港市區缺乏土地供應,人所共知,發展局推出之第三季地皮,全部位於新界,市區供應得個零雞蛋,市區樓價有乜辦法唔企硬吖!位於山頂嘅舊屋可以拆建,當然有不少人虎視眈眈,例如何東花園,賣得成,重建嘅話,有資格做超級豪宅,但特區政府基於文物保育理由,可能阻止,相信呢個問題有排傾。
講起何東花園,坊間盛傳何東曾立下遺囑,列明何東花園,東英大廈與東城大廈為三不賣,但實情係,彌敦道東英大廈早已賣咗,改建成TheONE,呢個「三不賣」之說,相信係以訛傳訛嘅啫,不可相信。左丁山問過一位前輩關於「三不賣」,前輩話何東逝世時(一九五六)根本未有東英大廈與東城大廈,呢兩座大廈係何東長子何世禮將軍於一九六○年代興建嘅,根本不會列在何東遺囑之內,至於何東花園,一向由何世禮將軍居住,直至一九九八年去世為止,死後將產業分與兒子何鴻毅與女兒何勉君,後來何氏兄妹分家,何勉君全權管理何東花園,何鴻毅管其他,於02及03年分別出售東英大廈與東城大廈,致力海外投資業務。
咦,賣香港地產,買海外資產,會唔會蝕底咗呀?本地地產自02、03年後急升噃?前輩話無相干,佢雖然唔知何鴻毅之海外投資分佈,但佢人在加拿大,對英國十分熟悉,啲錢如果放在倫敦房地產和多倫多房地產嘅話,回報率同樣可觀!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載