› 選擇地區
三藩市
紐約
洛杉磯
其他美國地區
香港 台灣 北美
 
2011年10月15日

難以學習慢下來 - 左丁山

中文大學在十月八日搞資訊日,向準大學生開放,於是由朝到晚,中大校園內人潮洶湧,人塞人,簡直水洩不通,學生Y話中學生一落火車已要排隊等候上中大校巴,打晒蛇餅,點解今年咁多人呢?
學生豪係第一屆文憑試考生,呢日大清早就與同班同學去中大,同行嘅仲有最後一屆中七高考生,兩屆學生明年一齊入大學。雖然話中七生可於十月九日再到中大,但人人怕執輸,大量湧到,唔怪得今年到中大參加資訊日嘅中學生人數,破晒紀錄。明年中大起碼要取錄六千人,比今年多一倍,學生話到時中大會有人滿之患,淨係到canteen排隊已經夠煩,搭轉營巴士排隊又係煩,好彩中大巴士夠多,上滿人即開,川流不息,但學生Y識得話:「相信中大嘅巴士運輸成本好高昂!」
學意大利就可以減輕成本嘞。大記者在十月八日回到香港,話俾我地聽意大利遊客極多,到處排長龍,大量本地人與遊客等巴士,隨時排隊等一個小時。巴士未等夠二十分鐘,雖然一早滿座,但一定唔開走,跟足時間表,亦完全唔見有額外巴士調動,以應急需。大記者話:「如果係香港,早已駡聲不絕,成為報紙頭版新聞,電台烽煙節目主持人又會大駡巴士公司無能,運輸署失責!」去到意大利,大記者話首先要學吓人地嘅悠閒態度,慢慢嚟,佢用香港時間去催促餐廳侍應:「係唔係漏單呀?碟意大利粉咁耐都唔嚟嘅?」侍應反而問佢:「女士,咁急做乜嘢呀?」大記者反而覺得唔好意思,放假旅行,趕成咁,對自己有乜好處?
但係一返到香港,「急忙因子」又在身體內活躍,大把追魂call搵大記者傾偈,與工程A食飯都要一路聽電話。工程A嘆曰:「香港樣樣嘢要快,做死人,但只有一樣嘢要拖慢,就係政府官。家政府官最怕俾立法會議員鬧,做乜工程都要追問:有冇諮詢區議會同唔同意先?明明所有部門都開晒綠燈嘅啦,都唔開工,要問咗區議會先,碰啱今年有區議會選舉,我地梗係要避風頭,拖到選舉後先至做嘢啦。」既然已有批文,一於開工咪得囉?工程A話:「此乃殖民地時期講法治嘅做法,今日要講政治,唔講法律,抱住老黃曆做事嘅工程師,一定俾公司炒魷!」

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載