› 選擇地區
三藩市
紐約
洛杉磯
其他美國地區
香港 台灣 北美
 
2012年01月09日

港人港地不可行 - 左丁山

行政長官選舉候選人梁振英推出房屋政策,其中最引人注意一項係「善用短期可發展土地(二至三年):推出港人港地,以賣出地契條款限制新建成住宅後只可售予香港居民。」
點解要有「港人港地」?背後原因係內地人來港買樓,產生擠出效應(crowdingouteffect),令本地人無法買樓(因為內地人更有錢,可出更高價),為咗抵銷(或說保護本地人)外人銀紙多嘅效果,就曾經有人提議過興建一啲樓宇只准香港人購買,外地人不得沾手,此人就是施永青,梁振英並非首創「港人港樓」呢個概念嘅。
站在自由港,自由市場,摒棄保護主義呢個角度,左丁山自然反對任何形式嘅保護主義,反對港人港地呢種借屍還魂嘅保護政策;外國當然有限制境外人士買官地物業嘅措施,但香港情形與外國完全不同,我地並無任何天然資源,發達靠晒物資與資本出入自由呢個大原則,全無資格搞保護主義。
根據中原地產代理研究部發表過嘅買家調查,大陸內地人在港買樓,以豪宅為主,仲未對中小型單位上車盤有大興趣,特區政府目前推出一啲「限量單位」、「限呎單位」,其實只係本地未有物業嘅人士會有興趣入市,換樓人士就未必嘞,換樓想換一間大啲嘅啫,點會賣六百呎舊樓去買入六百呎新樓㗎,如住在四十年殘舊六百呎,自然係例外。既然如此,將來港人港地實施起嚟,操作問題甚多,第一就係誰人可買?有無入息審查?如有,則與居屋有何不同?如無,則住在淺水灣、九肚山嘅富戶為子女掃貨入幾間,咁「港人港樓」又有乜幫助中產嘅意思?
解決目前香港最多爭議之房屋及產婦兩大問題,長期解決方法係擴大供應,即林奮強所講「做大個餅」,而唔係搞保護主義,限制需求。幾十年前經濟學者關於經濟發展方面,已有inward-looking(內向)與outward-looking(外向)政策之辯,如內向之中國印度變成大落後,外向四小龍贏晒,卒之中印現在都靠開放外向而衝番上嚟,香港斷不可能在二十一世紀走回頭路,阻止內地人來港產子買樓,愈係咁做,愈係會引發「香港」與「中國人」之身份紛爭。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載