› 選擇地區
三藩市
紐約
洛杉磯
其他美國地區
香港 台灣 北美
 
2012年03月01日

西九門 - 左丁山

唐英年住宅僭建一事,街頭巷尾講得熱鬧,梁振英「西九門」一事,談論唔算多,只在工程界專業界以及商界比較多人講,為何如此?
約兩個星期前,明報周日版專欄作家安裕簡略比較僭建門與西九門,佢話香港人喜歡講容易明白、即時明白之事,而人人都知道僭建為何物,於是人人識講,但西九填海概念設計比賽,比較高深嘞,評審員申報利益,利益衝突呢回事,屬較深入層次,香港人需要多做「五分鐘延伸閱讀」,先至會明白一啲。香港人鍾意即食麪,不少學者係即食評論專家,多做五分鐘延伸閱讀喎,走投好過啦,費事煩啦,譬如叫人在香港出版份「紐約時報」,唔執笠關門有鬼。
梁振英果然有辯才,開記者招待會講:「我無可能犯錯」,全世界錯晒,梁先生都唔會錯。DLS(威寧謝)係全港最大嘅QS(建築工料測量公司),員工眾多,威寧謝打電話去戴德梁行問價,或者向仲量聯行,世邦魏理仕問價,一定會收到答案。你試吓打電話去戴德梁行問價,有人肯服侍你,我地就十分佩服咯,何況詢問時仲附埋設計草圖(sketch)㖭。梁振英話佢唔知有四位同事隨後送上CV俾建築師行,一係推搪之詞,一係佢完全唔知公司發生乜嘢事,管理上有問題。惡佬明、工程C等工程界人士皆認為梁振英有可疑,如要還佢清白,最好立法會啟動特權法,要政府在三月二十五日前公開所有資料。
不過政府與中聯辦都唔希望立法會引用特權法,政府官員怕晒行政麻煩,一旦動用P&P,民政事務局起碼有三個月唔使做任何其他事務,要集中精神去應付立法會!中聯辦曾約見議員,試圖勸止,大概係驚住透露更多詳情,唔知會唔會拉埋董特首落水。
周末有代理來電:「喂,小陽春呀,有筍盤,要唔要睇?」邊度有咁多筍盤吖,市場資訊好流通嘅,但代理講到一個樓盤好筍,連租約,回報唔錯,九個月後租約到期,可以揀交吉或續租,但係唔可以睇樓,租客唔鍾意喎!唔睇樓,點買呀?代理話:「左生,信我啦,正嘢嚟㗎!」佢唔講尤是可,講多兩句都係覺得便宜莫貪!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載