› 選擇地區
三藩市
紐約
洛杉磯
其他美國地區
香港 台灣 北美
 
2012年03月05日

中央難定 - 左丁山

「天鳳凰、地鳳凰、天地鳳凰聚鳳凰」刊出後,收到報業高人即時回應之後,陸續收到十位讀者電郵,提供下聯,不過以左丁山之非專業意見,似乎都有啲牽強,多謝各位之餘,不一一刊出了。
西九門、僭建門、款待門逐一爆發,有如重磅深水炸彈,現任特首,未來特首皆受不同程度傷害,真係吾不欲觀之矣!如果你係習近平,年尾登上國家主席寶座,如何收拾香港呢個政治爛攤子?呢啲政治炸彈如在美國大選、英國大選、法國大選時爆炸,不足為奇,反正民主選舉一人一票,由人民決定罷了。但在中央可以高度控制嘅小圈子選舉制度,竟然有此等負面競選攻勢,實在難以置信,唔通中央真的放手不理?不想控制?好難咯,梁營最初處於下風,大打反欽點牌,中段到咗中央不反對梁振英參選,梁營就發功披露人大委員「意旨」,及後有僭建門之事,梁營民望接近五成,就改打民意民望牌,最近田北俊講投白票、流選,待五月六日重選,挺梁大將吳康民就講欽點嘞,話中央有大影響力,不會見到投白票流選喎,此外還大打欽點牌,傳出習近平欽點梁振英,以拉攏支持唐營嘅選委轉軚呢。
不過事情未必咁簡單,「蘋果」大捧習近平欽點梁振英之日,另有報紙向北京消息人士查問,得到嘅答覆係未聞此事,傳言不足信,該報紙立即唔敢跟風。還有奇怪事,吳康民大罵「信報」搞麥卡錫主義,反共成狂,但佢嘅徒弟曾鈺成宣佈退選後,竟然答應信報做獨家訪問,細說梁振英兩次打電話俾佢之時序(按:梁振英對曾鈺成講:我冇搞你黑材料),字裏行間,讀者都意會到曾鈺成係講乜嘢。曾鈺成會唔介意三月二十五日流選噃,一旦係咁,佢一定參加重選。
吳康民與曾鈺成過往關係咁親密,依家對流選嘅睇法大大不同,好明顯表示曾鈺成不挺梁,左派內部有矛盾,既然有人話到中央神通廣大,無所不知,無處不在,咁習近平點樣下決定呢?呢日中午往灣仔吃午飯,路上碰到一位政壇元老,俾佢捉住講幾句,左丁山話不如你探吓習近平點睇啦!元老話:「北京消息話習近平對現在香港一塌糊塗嘅情況直情嬲到震,要睇耐啲先下決定。」

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載