› 選擇地區
三藩市
紐約
洛杉磯
其他美國地區
香港 台灣 北美
 
2012年04月14日

保護醫生 - 左丁山

與泰國A吃午飯,講起佢位二千金正在美國讀醫科,已經讀咗六年,還有兩年先至畢業,再要到醫院實習三四年,前後近十年先至可以掛牌做醫生,訓練期遠比香港長,但香港醫學委員會就話美國醫生冇資格在香港行醫,要再考過試。泰國A講:「我諗個女都唔會返香港嘅嘞,頂多肯返嚟泰國做醫生,但亦要考一個泰國試,而且用泰文考,唔知個女啲泰文掂唔掂。」天下醫生盡皆保護主義啫,香港係咁,泰國何嘗不然。泰國女總理英祿上台後,實踐競選承諾,除最低工資在四月一日增加四成至每日三百銖外,公家醫院收費平到你唔信,睇病只需三十銖(港紙七元七角),搞到公家醫院爆晒棚,公立醫護人員做到儍,同香港一樣,向而家如雨後春筍地成立嘅私立醫院大逃亡,但是外國醫生仍然不准在泰國執業。
泰國醫生T話到咗2015年,東南亞(ASEAN)國家要全面向成員國開放所有專業,互認資格,醫生可到會員國執業,但如果泰國堅持外來醫生要考泰文試嘅話,實質就係唔俾外人入,到時最益新加坡,新加坡政府大開中門,歡迎外國醫生到新加坡公立醫院,每年聘請大量海外醫生,到時泰國醫生隨時走埋去新加坡㖭!
新特首梁振英聽聞幾醉心於學習新加坡政府之強勢領導,如果是真的,左丁山最希望佢學習新加坡政府不理當地本土醫生之私利,每年大量輸入海外醫生,但係梁先生敢唔敢呀?怕好難咯,一啲年青醫生同左丁山講過,佢地好唔滿意十幾位醫學界醫委集體投票俾梁振英,而唔係按照醫學界意見調查咁,梁振英得三成三醫生支持,就係只得三成三嘅選票。醫學界選委咁支持梁振英,梁生會唔會違背佢地反對輸入海外醫生嘅意願呀?相信唔會啩。正如張震遠一面盛讚林鄭月娥,希望林太留低,但另一方面劉夢熊就摑林太一巴,建議特赦村屋僭建!張震遠係用把口留人講吓啫,劉夢熊係用實際行動謝票,先至係真嘅,林太可以忍住氣來求任政務司司長?做咗都有排受氣!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載