› 選擇地區
三藩市
紐約
洛杉磯
其他美國地區
香港 台灣 北美
 
2012年05月07日

新式餐廳 - 左丁山

香港有不少美食餐廳,達到世界級水平,英國雜誌Restaurant在四月二十日公佈全球五十最佳餐廳,香港有一間入選,就係置地文華酒店內之Amber,香港米芝蓮三星食府Caprice只列為五十四名,龍景軒列第九十三名,澳門三星餐廳Robuchon列第八十二名,可見得啲飲食專家嘅評審標準,並不一樣。另一間香港二星餐廳BoInnovation列第五十二名。香港前四名餐廳之中,左丁山未去過Caprice(聽講訂位幾難吓),去過BoInnovation(位於雪廠街之時),但個人並不太喜歡分子料理。龍景軒係粵菜,我地食得多,無甚新奇,反而Amber就比較容易訂位噃,初開幕時,酒店小YY請左丁山去試吓,食黑豚肉,煎得好韌,印象分打晒折扣,但其後逐漸進步,兩個月前與金融M去吃午餐,好掂喎,服務尤佳,好值得推薦,至於係唔係全世界攞到第四十四名咁巴閉,左丁山未試過最好嘅前十名餐廳,不敢置評。
香港盛行茶餐廳文化之餘,近年開多咗好多新式歐洲餐廳,不少係五星酒店大廚與樓面經理合作,搵到老闆支持而開辦嘅,亦有不少富二代食住紅酒免稅呢個浪,加入葡萄酒入口、批發、儲藏行業,因對紅酒有興趣,賣酒賣得多而開埋新式餐廳,例如ThePawn、ThePressRoom,處於夾縫之間嘅舊式西餐廳就真係老化,難以經營咯,過往之紅寶石、龍記,仲耐啲嘅愛皮西,雄雞,車厘哥夫等名店,如今安在哉?占美廚房仍可在中環站穩陣腳,繼續賣「阿黃炒飯」、「白汁雞皇飯」、「德國豬手」,可算係奇蹟。
不上不落,不貴不便宜嘅西餐廳,在今天租金、工資、食材價格上揚嘅日子,好難經營嘅,大型中菜酒樓(兩三萬平方呎)亦難頂市場潮流,即使平租亦難搵人做,灣仔合和酒樓嘅旋轉餐廳多年來就係唔算貴唔算平嗰類餐廳,自助餐食物屬大路貨,平平無奇,只靠香港夜景招徠,最近話要結業咯喎,相信冇人覺得可惜,新租客傳係西班牙名廚PacoRoncaro,相信有啲睇頭。今時今日市場兩極化,一係廉價多銷,一係高價吸引富有人家,中價零售店/餐廳可以走去邊?相信領匯商場係較佳出路!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載