› 選擇地區
三藩市
紐約
洛杉磯
其他美國地區
香港 台灣 北美
 
2012年05月14日

推行電子書 - 左丁山

電腦專家S嘅寫字樓在雲咸街,近因加租,計唔掂數,要搬去海味區,寫字樓愈近西環,租金愈係便宜一啲。「金融時報」前星期有一篇報導謂不少歐洲人移居香港,係年青冇錢有活力有創意一族,幾年前在上環文武廟一帶落腳,現因租金上升,逐漸移去港島西,唔怪得在上環西營盤蘇豪區附近,隨時碰到個樣及裝扮完全唔似律師、會計師、賓架嘅西人。
電腦S突然走嚟探訪,問佢做乜咁得閒,佢話:「唔係得閒呀,可能有錢搵,故此搵你傾吓先。孫局長話政府投放五千萬元搞電子書,我與幾位行家傾過,一致看淡,認為在香港推出電子書,代替印刷書,係好大喜功,必然失敗收場。但既然政府出錢,我又不妨與不牟利團體合作申辦電子書開發啫,叫做不牟利,但我地起碼搵番一筆人工先!」左丁山不懂申辦開發電子書,只係講幾個大學專家嘅名,叫佢去訪問,再深入研究。
兩日後電腦S又嚟搵左丁山,「喂,我去大學見過專家,專家好悲觀,認為教育局完全不理解學校情況,香港本地學校嘅電腦電子基建非常落後,學校即使安裝咗一套設備及Wi-Fi系統,都冇錢請技工維修,問題多到數唔晒,一兩間學校號稱有先進方法,其實係作為展覽,吸引外行人而已。」
啱啱有位讀者Arrow來郵批評左丁山唱淡電子書,提出三點質疑,其中第二點係出版界M不想電子化,因為「紙和印刷」是最大開銷,而且印刷機的投資往往是十年八年的事;呢點完全錯晒,Arrow君大概不了解,出版與印刷係兩個不同行業,出版M間公司並不投資印刷機,印刷與紙張只係佢地嘅變動成本。Arrow話:寫落iOSorAndroid,只不過「copyandpaste咁易。」以此問電腦S,佢話邊有咁容易㗎,依家佢地用HTML5寫書,適用於桌上電腦,手提電腦,智能電話及tablet等等,程序並非話咁易。Arrow君又講最平一本tab只賣$599,足夠run所有中小學電子書的程式,電腦S話如果係美金$599就太貴,係港元$599就係大陸最廉產品,幾唔可靠,下載十部八部電子書已經用完記憶體!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載