› 選擇地區
三藩市
紐約
洛杉磯
其他美國地區
香港 台灣 北美
 
2012年05月22日

公開徵才 - 左丁山

香港失業率甚低,二至四月份嘅失業率低至3.3%,與歐盟國家失業率動輒超過10%及美國失業率8.7%相比,香港就業量真係恨死隔籬。
香港失業率低,意味搵工容易,請人困難。候任特首梁振英在此時候竟然設立一個「遴選委員會」,邀請現挺唐大將胡定旭(總商會主席),梁營主力高靜芝(人力資源專家),陳振彬(青年事務委員會主席),以及唔少得嘅羅范椒芬做委員,負責挑選副局長、政治助理,聲言全港自問有資格人士「毛遂自薦」。各位有志之士,機會嚟喇,想入政府而以前入唔到嘅,不妨趁此黃金機會,快啲寫信去應徵。
問一位80後碩士:「有冇興趣應徵呀?」佢一面茫然,「政治助理做啲乜嘢?係唔係內定㗎嘞?」呢樣有無內定,外人唔知,相信他日宣佈最後上位人選時,為了公關形象,呢個委員會點都會搵一兩位基層出身,讀書成績優秀,無名人推薦嘅80後做政治助理,向社會交代嘅,否則如果選到嘅人位位都係政界、商界、學術界人士嘅子姪世交,實俾人鬧啫!
有人懷疑梁先生做騷,有人懷疑梁先生無號召力,搵唔到有能有才之士做副局長,故此公開招聘,以示用人唯才,究竟係邊樣,無謂推測,或者兩樣都係呢。梁先生候任特首辦公室之重用羅范椒芬,證明是對的,梁營中人,有邊位有羅太咁勇猛肯做,既到立法會舌戰泛民議員,又打電話到教育局搵官員(傳聞係張國華博士)問料,兼分享佢嘅睇法呀。羅太有此表現,論功行賞,梁生實在好難唔邀請羅太入行政會議,做佢嘅「官員管理顧問」。有一位教師就諗多一層,對左丁山講:「睇落梁生冇羅太唔得,否則搞交接(transition)已經拿手唔成勢,而羅太對教育事務咁上心,咁熟,我驚無論乜嘢人做教育局局長,背後都見到羅太嘅身影!」假如這是真的,張文光不如繼續做立法會議員咯,否則誰與抗衡?

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載