› 選擇地區
三藩市
紐約
洛杉磯
其他美國地區
香港 台灣 北美
 
2012年06月10日

政治助理不吸引 - 左丁山

下任政府之架構改革方案,是否通過,還是未知數,相信在建制派強力護行之下,在立法會通過係有驚無險格,最後可以通過,但是否趕得及在原先計算嘅六月二十日通過,又未必肯定。雖則如此,據報有一千一百人申請做新政府嘅副局長以及政治助理。坦白講,副局長有月薪二十二萬元,對一般商界及專業人士有吸引力,申請者眾,不必驚奇,但政治助理方面,人工唔再係十二萬元咯喎,而係每局只有十萬元,局方可聘請一至四五位政治助理,譬如有四位,每位月薪二萬五千元,不過不失,對大學畢業生嚟講,唔算係一份真正筍工。
聽講一啲政策局唔想請咁多位政治助理,只係想請一啲有專業知識嘅三十幾歲人士,可惜呢,以後人工大減,呢類人未必願意做,例如財經事務及庫務局嗰位政治助理伍女士以前係美林證券僱員,人工有番咁上下,以後政助月薪上限只係十萬元,左丁山好懷疑伍女士會唔會肯繼續做下去,相反,食衞局政治助理陳智遠未入政府前,月薪只有兩萬幾,佢就無所謂啦,有得留任應該高興咯,但高永文(疑似新局長)或者另有打算呢!
申請做副局長,篩選比較容易,第一個回合就會肥咗好多人,反而政助方面,位位差不多,如果真係要揀,非內定,遴選委員會有排煩,邊度可以在七月一日前下決定呀!外國嘅政治助理通常會做幾年,累積經驗就會走去競選州議員,逐步邁向眾議院、參議院之路,或者係轉行做政治公關、政治遊說(lobbyist)搵真銀。香港政治助理如有心從政,競選路途遙遠,做說客極難,似係走入職業死胡同,叫做過吓癮,學番啲政治經驗就算嘞,不必期望太高;大學畢業生做兩年M.T.,有望升做VP咯,做五年政治助理,出番嚟還是重新起步,人工高到十萬元就話啫,兩萬幾三萬一個月就制唔過!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載