蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年08月17日
馬上成為壹會員

做工與做人 - 左丁山

退休人力資源董事到私立大學講21世紀人才需要,講完要旨之後,指出萬變不離其宗,無論甚麼專才人才天才,欲在不是爸爸控制的公司、企業或公營部門出人頭地,還是需要遵守基本做人之道,即待人以禮,適當謙虛,敬業樂業,新畢業生上工更要注重守時,萬萬不能遲到,最好早返工起碼十五分鐘,並非益公司喎,而係適應地鐵或巴士或行路返工之後,頭髮難免亂亂地,額頭有汗,領帶不整,諸如此類,早返工少少就可以有時間走入洗手間整理儀容片刻,用冷水抹下面,出到嚟都零舍精神爽利,預備開工。
講到咁仔細,大概只有上一代人事部主管先至要求咁高,今之80後90後,聽唔聽得入耳呀,專家Y話:「年青人有自己想法:有權唔聽嘅,不過唔聽就唔好怨天怨地點解自己冇得升級。有本事有天才都好,冇禮貌,儀容不整,行事粗魯,始終係好蝕底,啲爹哋媽咪應該在家就訓練兒女,等佢地學曉禮貌,規律,唔好以為樣樣奉旨,譬如我在家就一定要兒女做一啲嘢,例如一個洗碗,一個掃地,自己執床鋪……」左丁山打斷佢:「咁菲傭做乜?」專家Y話:「咪囉,你地倚賴菲傭太多,兒女倚賴菲傭太多,你估好好?千其唔好寵壞子女呀。」
呢個問題確係惡搞啲,富裕中產必須面對佢地兒女在社會上競爭之問題。大富人家仔女可以唔駛做,自有遺產,至於會唔會敗家爭產,乃日後之事,基層清貧兒童一出世就知道要掙扎求存,競爭力特強,但富裕中產兒童不上不下,大學畢業後一定要打工,要面臨競爭與挑戰,如自小在家被父母與菲傭呵護過甚,出到中環返工,EQ可能受到極大考驗。專家Y話佢見過一位廿歲大男孩俾上司窒過幾次之後,對上司講:「就算我做錯,你都唔好次次鬧我吖,買盒朱古力吓我好唔好?」上司為之啼笑皆非。至於有人頂不住所謂壓力,一個月後就不上班,由媽咪打電話到公司代個女辭工嘅事情更不時發生。專家Y話私立大學從新開始,毫無包袱,而且學生人數比較少,應該在教學之餘,亦同時教學生做人處世之道,如能做得到,畢業先可能更受僱主歡迎。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載