蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年09月16日
馬上成為壹會員

田北俊呢次腰骨硬 - 左丁山

立法會選舉後,罕有投票嘅朋友講起泛民主派得票多過民建聯、工聯會等,但直選議席就反而少啲,幾乎個個認為公民黨損人不利己,余若薇陳淑莊既然無意做議員(按:甘願排名第二即係有意思退出立法會,否則現任議員點都應該排名第一,又或者係余若薇、陳淑莊同屬一張名單,在港島競選,以示必勝決心。),雖然陳余兩位阿姐點都唔認,可憐李永達陳樹英夫婦就多得余若薇唔少。李永達叫做係做得嘢嘅議員,在房屋方面出力尤多,今次不足一千票落敗,輸咗第九席俾民建聯新人,但同是泛民嘅郭家麒余若薇名單就多出三萬幾張無用選票,幾陰功㗎。大狀還是做番法律專業好,搞政治就唔夠政治智慧,有呢啲咁嘅對手,唔怪得譚耀宗在鏡頭前抹眼淚,歡喜到喊也。
沙田選民通報,排第八名入選嘅田北俊(31016票),勝來非僥倖,佢間「萬泰」與鄭家「永泰」在選舉前以三十億元多投得九肚山豪宅用地,自己住在山頂,係億萬大富豪,估唔到呢位貴介公子竟然有無比意志,不停在沙田區拉票,駿景園選民見過佢站在大閘外曬太陽,向出入汽車揮手致意,又有阿婆見到佢站在沙田舊街市外曬太陽,向路人揮手。一位阿婆話:「田少好勤力㗎,一年前已到沙田站崗,我見過佢好多次,人哋話俾我聽佢就係G2000大老闆田北辰嘅哥哥,我最初都唔敢相信,佢真係有福唔享,攞苦嚟辛㗎。我本來有阿伯叫我投陳克勤嘅,但我覺得田少仲勤力過陳克勤,結果投票俾田老闆!」咦咁講法,田少當選,靠自己多過靠人哋配票或西環支持,票票靠揼石仔值得驕傲,正因如此,佢重返立法會,背脊會比以前更硬,不欠任何人一個人情!梁特首想有佢嗰票支持,未必咁易。佢嘅細佬田北辰亦在新界西當選,創下兄弟同是議員嘅歷史,會唔會兄弟同心其利斷金呀?還是好似一位評論員咁講,兩人同枱食飯各自修行,各有各做?五十年代馬場有兩位兄弟騎師,別名「大雞」、「細雞」,評馬人有流傳一時嘅名句,「大細雞有變」,為佢兩兄弟同場而頭痛。田氏兄弟同入立會,幾時合作,幾時有變,要麻煩9月12日晚上入馬場嘅CY嚟估。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載