› 選擇地區
三藩市
紐約
洛杉磯
其他美國地區
香港 台灣 北美
 
2012年10月16日

哈佛係神 - 左丁山

周生生集團執行董事周敬成係註冊牙醫,身家大把,為要送兩名兒子進入哈佛大學,被騙港元一千六百七十萬元,因兒子入哈佛不成,在麻省地方法院提交申訴書,追討所失款項。
呢種事經蘋果日報披露,即時成為上流社會及教育界話題,人人都問:「入哈佛駛唔駛咁貴呀?」或者:「駛唔駛咁搏呀?入唔到哈佛又點啫?」呢日與一班前輩吃午飯,有兩三位億萬富豪都視之為笑話,慨嘆既然使得起咁大筆錢,被騙就當笨一次,點解要搞到上法庭,令全世界街知巷聞,當事人還有甚麼面子?
哈佛神話令人迷迷茫茫,失去知覺。左丁山一位後輩自幼頑皮,自細就聽人講得多,讀小學五年級時,有一次居然在公眾場合:「我要讀哈佛!」幾十位在場親友為之側目,不少人笑佢,「你中英文都寫唔出五十字,讀乜嘢哈佛大學呀?」點知細路有急智,被眾人取笑後,識得澄清:「我話讀哈佛,即係哈爾濱佛教大學呀!」眾人笑到碌地,細路仔有如此急才,抵佢後來考入中大。有錢人不妨到哈爾濱申辦一間哈爾濱哈佛大學,簡稱哈佛,以滿足一啲人嘅虛榮心啦!
哈佛咁有吸引力,明星級魅力,豈止係一間著名研究大學咁簡單,先至令一般家長為她神魂顛倒。左丁山呢類人物,冇資格入哈佛,但在中環打滾多年,見過不少哈佛畢業生,叻人又真係多嘅,如利豐馮氏兄弟最頂呱呱,老友記博士L係哈佛博士,昔年老師K嘅細仔亦然,見得多就不覺得哈佛太神奇,差嘅都有啫,不過無謂講人地笑話啦,人地讀完哈佛就成為名人吖嘛。
肥仔K中學時期到過耶魯大學夏令營兩次,大學時到過哈佛讀暑期英語班,問佢兩者有何形式分別,佢諗咗一輪後就講:「耶魯好似比較低調,不尚吹牛,樣樣平淡,要學生自己去領略,比較踏實。哈佛就唔同咯,辦暑期班明顯係要賺錢,住宿舍樣樣講錢,俾到你肉痛,但做騷交足貨噃,校長森瑪斯親自向暑期生打氣,搵諾貝爾獎得主對英文班學生演講,大牌教授出動,猛話Harvard is the best, we would not want you if you are not the best of the best!搞到我地飄飄然信心大增,如果讀哈佛四年,相信更加自覺威猛!」咁又係,哈佛歷史上,出產名人猛人無數,一位數學系校友成為unabomber,被捕之後,記者問哈佛攞反應,新聞發言人話:「Harvard produces the best, criminals included!」咁巴閉,大概有錢人為咗送兒女入哈佛,捐多多錢都肯!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載