› 選擇地區
三藩市
紐約
洛杉磯
其他美國地區
香港 台灣 北美
 
2012年10月20日

最好否決特惠生果金 - 左丁山

唔係今屆諾貝爾獎經濟學獎落在Alvin Roth(羅夫)與Lloyd Shapley(沙普利)兩人手中,左丁山都唔知道好多地方已經應用呢兩位大師嘅數學與經濟學理論,聽科大雷鼎鳴教授講,我地大學聯招(JUPAS)與中小學派位嘅方法,其實就係這兩位研究發展出嚟嘅stable matching方法。沙普利係數學家,自己話一日經濟學都未讀過,但佢嘅理論被經濟學家羅夫以不同方法做嘅實驗研究(empirical study)證明可行,用以配對美國醫科畢業生俾醫院,十分有效,現在紐約、波士頓、倫敦都用緊羅夫嘅市場設計與配對(market design and matching)方法嚟分派中學學位。
如果話經濟學乃經邦濟民之學,咁宏觀經濟學搞凱恩斯,搞QE一,二,三,以至QE無限,嚟刺激經濟,帶動股市、就係經邦,成效至今存疑;微觀經濟學發展出嚟嘅資源分配法就真係在真實世界好有實用價值嘞,我地不知不覺地已經活在其中。講到尾,人是經濟動物,群體之社會行為易受經濟誘因與罰則影響及集體改變,只講再分配(re-distribution)而不講資源從那裏來之社工學者唔該上吓經濟課。
今次特惠生果金是否需要資產審查(政府稱之為資產申報)引起大爭論,有一個特點,就係好多社會學社工教授級人馬撐資產申報,泛工黨議員(民建聯加工聯會加泛民)就要求不設審查。左丁山嘅立場好鮮明,就係派錢要審慎,唔派就最好,如果要派,就應該有資產審查,等啲真係有需要嘅人士去攞,而唔係經常出入福臨門嘅長者都可以攞埋一份,否則香港公共財政好易乾塘(按:據雷鼎鳴教授估計,如不斷派錢,香港之財政儲備在2031-2041年間會派清光),全香港變成希臘西班牙,呢一點連中學生都識得在城市論壇窒到議員王國興口啞。泛工黨議員可以大聲要求加稅嘅,咁就請佢地睇吓今日法國社會黨奧朗德做上總統後,聲言抽富人稅75%,LV大股東也要申請入籍比利時!奧朗德話要向企業加稅,於是所有企業拖慢或取消投資計劃,經濟前景變差。做議員淨係識嗌口號,有乜用呀!佢地最好堅決反對資產審查,讓特惠生果金泡湯,啲80後90後會安樂晒,佢地係未來之主要納稅人噃!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載