› 選擇地區
三藩市
紐約
洛杉磯
其他美國地區
香港 台灣 北美
 
2012年10月21日

中一2班26人 - 左丁山

偶然間遇到一間地區英文中學嘅中一學生,入呢間學校相當難,差不多人人都是讀小學時考第一或第二名嘅小學尖子,中一學位爭到打崩頭,佢地入學之後,居然亦知道以後六年要勤力讀書,爭取文憑試好成績,對於非考試有關活動,例如體育、音樂、美術等等,多謝嘞,唔好搞我。睇吓個戴眼鏡嘅樣子已可猜測到佢地人人讀書勤力,邊度似李慧詩、葉姵延咁健康Look呀。
香港辦教育,由於學生少,學校多,為咗爭取學生入學,除咗上述呢類學校之外,間間學校嘅校長都頭痛,誠恐收生不足,教育局會殺校,教員失業。全港咁多中學,但只有直資英中、津貼英中、英基中學、國際學校不愁學生不來,佢地收生收唔切,加極學費都難阻學童湧入嚟,搞到啲外資外籍僱員嘈到坼天,要搬去新加坡。但其他母語教學嘅中文中學若無歷史傳統,就慘情咯,校長絞盡腦汁,去區內小學做路演,聯絡小學校長(本身亦為小一收生煩惱)請求幫忙,一位校長對左丁山講過:「為咗我,為咗教員飯碗,中一收生一個不能少!」
究竟要收幾多個先至夠?未來幾年升中學生大幅度減少二萬餘人,以前好景時可以開四班中一,收一百二十人左右,依家教育局都驚,大量殺校即係逼教協教聯上街啫,梁班子繼國教教訓後,焉敢掉以輕心,將「殺校線」下調至中一收生為三班五十一人,每班平均十七人,但在十月十七日再調低死線至2班26人,即每班13人,雖無小班教育之名,已有「小小班」之實。左丁山識嗰位校長,聞訊大喜,幾乎想請左丁山飲杯波波啤,放鬆吓神經。中一2班26人?想當年,校長與左丁山讀中學年代,一班有45人,幾乎連位都冇得坐,與今日相比,差天共地。今日最慘嘅,就係百幾間英中名校與英基學校、國際學校門限為穿,其他中文中學就沿門托缽,貧富極度懸殊。香港之殘酷現實就係中文中學母語教學冇前途,家長崇拜英語教學,忽視中文。以後冇咗高考,文憑試之中文科十分重要,攞2級或以下,入大學機會就大大降低,唔該一啲家長注意及之,連男拔萃都話要同協恩女校合作改善學生中文程度,知道點解喇啩?。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載