› 選擇地區
三藩市
紐約
洛杉磯
其他美國地區
香港 台灣 北美
 
2012年10月29日

就業性大學排名 - 左丁山

一年到終世界上有不少大學排名榜出現,令大學又愛又恨,愛者,如果大學位列前一百名,前五十名,前十名嘅話,校長面上貼金,校友開心,學生與有榮焉,出去搵工都大聲啲,大學籌款亦昂起頭,唔似沿門托缽;恨者,就係各評級機構列下啲評級條件令大學不敢不從,精仔學校依足嚟做,肯定會有着數,但如此一來,大學豈非為排名而活,本身獨立自主性何存?因是之故,美國有一啲文理學院(liberal arts college)拒絕玩排名遊戲,威水大學如芝加哥大學亦曾拒絕一份已經不再發行印刷版本嘅雜誌《美國新聞與世界報導》嘅排名填交資料工作,於是排名下滑,但芝大後來受不住校友壓力,幾年前願意同呢份雜誌合作番,立即打入成美國十大。
玩遊戲有規則,譬如有報刊大學EMBA排名嘅條件之一係大學國際化,於是大學聘用多幾個外籍教員與招收外國學生;條件話要注重性別均衡,於是請人時故意聘請多兩三個女教授;條件話教員要全部係PhD(博士),於是老經驗如退休大賓架,呢類實戰經驗豐富但無博士學位嘅教師會被割愛,諸如此類,做到足之後,大學EMBA排名立即升級。
又有一份排名榜出籠嘞,就係國際先驅論壇報嘅2012 Global Employability Survey(全球就業性調查),報紙委託巴黎顧問公司Emerging及德國就業顧問公司Trendence,從五月十八日至六月十日向全球2500間公司及2200個國際CEO及經理調查,請佢地根據學生之就業能力(employability)為全球大學評級,所謂employability,就係佢地心目中之語言重要性(英語、中文、法文……),學生之地域關係,軟實力(如team player)等等等;結果如何呢?前十名大學係人都識,估中冇獎,就係哈佛、耶魯、劍橋、牛津、史丹福、麻省理工、哥倫比亞、普林斯頓、倫大帝國學院、法蘭克福哥德大學。第十一名,北京大學囉,中國大學上榜嘅有北大(11)、復旦(28)、上海交通(44,去年139,今年大躍進)、清華(84),中國香港有冇大學上名呀?有嘅,就係科大(46)!中文大學呢,不入前100名,只係名列109,與科大相距甚遠。咦有冇睇錯,港大去咗邊,將份名單睇咗三次,港大不入前150名之內,港大仲未搵到新校長,唔駛理會呢份就業性排名啦。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載