蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年11月14日
馬上成為壹會員

美國年老白人 - 左丁山

美國大選過後,共和黨擁躉大為沮喪。呢日在中環碰到一位美國賓架H,已經係幾十歲長者人物,數星期前收到大信封,冇咗份工,房屋津貼冇埋,睇怕一兩個月之內一定要返回紐約,但佢對香港與亞洲依依不捨,仲想試吓搵工,問計左丁山,左丁山坦白同佢講:「今天之銀行業務興食快餐,不講求長期關係之作風,已非你所能適應,加上亞洲公司唔係特別重視老人家之經驗,不如都係返去紐約好過,起碼還有社會保障金可拿。」點知賓架H大發牢騷:「離鄉數十年,美國已非我所認得之美國,紐約天氣凍,物價貴到死,出外食餐飯亦硬性俾18%貼士,再加營業稅,餐廳與政府簡直搶錢,我不如到泰國清邁或者布吉退休好過,天氣和暖,靚女多,物價平,食物好,我仲可以負擔得起請一位女傭㖭。有少少錢自己用好過返美國交稅養懶人。」
唔,講起養懶人,據「紐約時報」一位專欄作家講,共和黨窮得只剩下grumpy old white men(愛發牢騷的白種老男人)支持者,話俾賓架H聽,有此一說,佢不怒反笑:「啱呀,我就係呢種人。我嘅大學女同學(白人)從L.A.來電郵,話對奧巴馬連任感到絕望,佢出身貧窮,辛苦半工讀完成大學課程,成為律師,嫁咗一個白人工程師,兩夫妻有三子一女,三子都係醫生,女兒係律師,當然係年入二十五萬美元以上,會俾奧巴馬行將徵收富人稅嗰類家庭。佢話好唔順氣在加州交重稅,津貼拉丁美裔,非洲裔及白人女子吃避孕藥,墮胎三次以及未婚產子,美國正在歐洲化,社會福利大躍進,邊個付鈔呀?咪係我地白人與你地亞洲裔美國人囉!」
唔怪得話呢次大選暴露美國已一分為二,黑人94%投票俾奧巴馬,拉丁裔70%擁奧,女人55%擁奧,白人58%支持羅姆尼,將來白人會變成美國少數族裔,年老白種男人更加冇地企,共和黨想贏番白宮,必須轉軚,但如此一來,茶黨會變得更激進,美國政治更加兩極化!賓架H最後講:「移民到泰國退休可能係我最佳選擇,可以遠離美國是非。」左丁山忽然醒起,同佢講:「咁樣會放棄身為美國人的尊嚴與榮耀!」賓架H瞪左丁山一眼:「唔好講廢話,我就嚟連美國護照都放棄埋,在香港工作十年,可以攞香港身份證!」

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載