› 選擇地區
三藩市
紐約
洛杉磯
其他美國地區
香港 台灣 北美
 
2012年11月20日

有生意唔敢接 - 左丁山

一間老牌公司發盈警,原因幾特別,據蔡東豪在爽報講,就係因為人手不足,請唔到工人!嘩,呢件新聞若在西班牙發生,會被視為天下奇聞,西班牙年青人失業率超過五成,整體失業率在百分之二十五以上,周街工人冇工做,巴塞隆拿嘅「魯營」球場坐滿有近十萬人,內裏可能有二萬五千人係失業漢,如果佢地可以來工作而又識得飛機維修嘅話,香港呢間公司大可以發盈喜通告。
呢間公司就係港機工程(044),幾年前左丁山買賣過佢嘅股票。有一位親戚兩代在港機工程工作,加埋有五十年,收入十分穩定,但第二代工作二十幾年之後,逐漸唔見到有年青人入行跟佢學師,已隱約覺得唔妥,驚住一啲技術會在本港中斷、失傳。港機工程在十月八日嘅營業聲明話,公司業務穩定,但因為熟手技工及半熟手技工,特別係機艙裝修方面,由於唔夠人手嘅關係,唔敢接生意,例如2012下半年及2013年上半年只有一百一十萬工時(man-hour)可供應用,但2012年上半年嘅維修訂單有一百一十六萬工時,因此有單不能接,生意量已到極限,盈利當然增長有限。
左丁山好早就知道港機工程缺乏人手,事實上,成個機場都缺乏勞工,好多工冇人做,對香港年青人嚟講,根本冇失業呢回事,只要讀不上大學就退而思其次,去學師,做學徒起步,學到一技傍身,就唔怕冇工做。建造業工人宣佈大幅度加薪之後,電梯維修業大公司「迅達」(Schindler)願意在2013年為全體員工加薪三次,加幅至少百分之十三點五!
與此相比,一啲銀行猛話裁員,一啲工種嘅薪水比較低,但一般稱之謂「藍領」嘅行業就非常缺乏年青人入行!一位親戚當年因會考成績不佳,走去學木工,依家成為師傅,開工要過千蚊一日至肯制,佢一位同學會考及格走去做文員,最初以為幾好,點知近年公司不斷將後勤工作外判至馬尼拉、深圳、廣州等地,佢好驚職位不保,心理有壓力。近日見到樂施會調查(不知用甚麼方法)香港貧窮,指不少人月收少於三千四百元,呢類恐怕係老人家啩,不能作準,樂施會如有心反貧窮,不如周圍宣傳,勸年青人學做技工啦,如此掃貧,有效過要求政府派錢!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載