› 選擇地區
三藩市
紐約
洛杉磯
其他美國地區
香港 台灣 北美
 
2013年01月19日

明天的施政報告 - 左丁山

由十月拖到一月,足足三個月後,梁振英發表第一份施政報告,講足兩小時有多,難為好多立法會議員聽到瞌眼瞓,都係梁國雄醒目,適當時候就嘈一輪,立法會主席曾鈺成例牌趕佢出場,大約係十一點幾,時間啱啱好,即使約咗人食午飯,都可以準時到達,去嘆啤酒好過聽CY讀稿啦。
施政報告有冇益到市民大眾?絕大部份納稅人都冇糖食,事前已經講到明,唔駛納稅嘅基層市民,咪聽住先囉,未來五年,公屋難有突破性發展,要待2018年後,公屋興建量先至會平均每年增加至兩萬個,房屋呀、新土地呀,亦係要等到2018之後才有顯著增幅。CY任期在2017年告滿,如果佢冇得連任,辛辛苦苦開拓土地,豈非為他人作嫁衣裳?全世界政治人物都唔會甘心只做一任嘅,CY早知增闢土地需時,隨時一幅地要搞十年八年(例如洪水橋、啟德、西九、新界東北)先至真係可以開工起樓,CY若無連任之意,咁辛苦去搵地,高呼「寸土必爭」,究竟為乜噃!泛民議員要CY下台,佢偏要做到2022,所謂2017特首有普選,睇嚟係一場遊戲,施政報告對政制、普選着墨甚少,係咁意講幾句,大家當知係乜嘢原因。
要鬧佢唔能夠即刻解決房屋(主要係公屋)不足,係可以鬧嘅,但任何人做特首個位,在今天香港,都不能話起公屋就起公屋。電視台訪問一位大角嘴居民,佢話好想快啲上樓,大角嘴好多地可以起公屋吖,佢想住番大角嘴,此乃不少基層市民嘅想法與期望,但現實歸現實,大角嘴去邊度搵地起另一個類似「蘇屋邨」出嚟?有教授話香港大把地,只要發展1%郊野用地,已可提供一百萬人嘅房屋,鬼唔知,林鄭月娥曾經如是話,CY競選時亦有類似意思,但到咗諮詢時期,啲環保團體肯過你?包保示威抗議不絕。香港可以發展新土地,但根據目前城規條例,諮詢期冗長,係人都可以提意見,香港要學新加坡咁,奢侈到可以填海營造一個近市中心嘅高爾夫球場,見鬼易過。梁振英冇辦法即時起樓,施政報告不能不高唱明天更好嘅願景,如果眾人可以忍受到佢在任至2022年嘅話。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載