› 選擇地區
三藩市
紐約
洛杉磯
其他美國地區
香港 台灣 北美
 
2013年01月29日

爽報左傾? - 左丁山

劉夢熊突然向梁振英、張震遠擲「炸彈」,公開指責佢地講大話,梁振英根本冇搵過「專家」視察山頂梁宅之僭建。現在講清楚啦,梁粉內鬨,唔係劉夢熊講大話就係張震遠講大話、梁振英一派胡言!劉夢熊講大話猶自可,佢根本冇乜社會地位,有識之士根本當佢笑話一場,只係梁營當初視之為重要爛打棋子啫。張梁講大話就大件事,按西方標準(對唔住,成日講西方標準),政治人物講大話,係冇法子再擔任公職嘅,即係玩完咁解。今次立法會內嘅反梁倒梁派有劉夢熊送上火箭炮,唔發動總攻擊就係膽小鬼。
在有缺失嘅選舉制度下,選出梁振英領導香港,十分氣人,當務之急是民主派盡力爭取2017年特首普選係真普選,不是鳥籠裏的普選,讓候選人只係梁振英對曾鈺成,其他人士只能袖手旁觀,頂多放棄投票。劉夢熊在《陽光時務週刊》之言,十足係粵語殘片內之怨婦罵佬,條佬媾女時,向怨婦開出甚多空頭支票,但得手後,全部支票彈票,不得兌現,於是怨婦一哭二罵三上吊,威脅不成之餘,索性扯爛塊面,向記者爆料,係要唱衰條佬,公眾睇戲之餘,對兩人都不應全部相信。
講番轉頭,香港現有一股向左轉,搞社會主義,樣樣搵政府派糧派錢嘅風氣,亦助長咗梁振英呢類人物之興起,梁振英成功為自己推出一個「適度有為」,夠膽話市場失敗(market failure)政府要干預,政府興建大量公屋嘅形象,以凸顯唐英年仍然係「積極不干預」嘅自由派、地產派、迷信市場派,於是在年青大學生中全面性壓倒唐英年(啲天真學生現在大概會呻笨),而大部份報紙記者筆下同時為梁振英捧場㖭。劉夢熊在周刊訪問中講到自己扭轉梁振英民望低迷嘅形勢,沾沾自喜,佢其實應該多謝香港當時有咁多simple and naive嘅學生、記者與老人,相信梁振英有能力嗰一套說辭。
肥仔K傳來短訊叫左丁山睇爽報(一月二十四日星期四第19頁爽通識版),指有這樣的通識老師,香港學生焉會不向左轉,變成左派思維信徒。呢位通識老師葉一知,以幾十年來左派批判跨國企業嘅內向(inward looking)思維,批判跨國企業剝削發展中國家兼令發達國家失業,學生信以為真,就走上街頭反霸反殖反資本主義。其實爽報可能係向左轉,否則嘅話,爽通識應該在刊出葉一知觀點之時,亦應請李兆富講一講,讓學生睇到兩派觀點。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載