› 選擇地區
三藩市
紐約
洛杉磯
其他美國地區
香港 台灣 北美
 
2013年02月02日

德國電費 - 左丁山

世界上邊度會有人唔鍾意清新空氣,可持續潔淨能源㗎,但人類既要脫離貧窮,追求GDP增長,增加就業量,又要同時削減碳排放,清潔環境,保存百年古物,正是魚與熊掌,可否兼得?可以就當然最好!如果香港有1842年嘅空氣污染指數,又有2012年嘅財富,梗係人間天堂啦。
世界上有一種發電能量,可以代替污染程度高嘅石油、煤炭,以及生之不絕,維持經濟增長嘅,就係核子發電嘞。可惜呢,萬一發生2011年日本311事件嘅話,後果嚇死人,故此素來注重核能嘅德國,在日本311之後,宣佈全個德國逐步取消核子發電,到2022年所有核子發電廠停擺。德國咁發達,用甚麼代替核能?德國有「綠黨」,勢力龐大,與社會民主黨合作控制上議院,影響所及,德國好自然咁就採取以可持續再生能源嚟發電,代替核能,不過從頭開始噃,錢從何來?唔,加稅咪得囉,總理默克爾夫人嘅基督教民主黨與自由民主黨聯盟政府於是諗住德國人重視空氣,唔旨在俾多啲,於是人民每月嘅電費單徵收「環境附加費」,由2013年一月開始,再度增加收費,由3.59仙增至5.277仙per kWh(每度電),增幅高達47%,一個三人家庭每年要交環境附加費185歐元,比2012年增加60歐元。所有附加費嘅總收入係用來津貼新能源發電廠,否則嘅話,呢啲新能源電廠老早執笠。在2013年,總津貼會增加到二百億三千六百萬歐元,但為咗維持工業競爭力,大工業用戶(如化工企業)毋須繳交環境附加費。
德國人即使有智慧,係一等公民,支持環保,都忍受不住啦,執政黨在地方選舉輸完又輸,已見選民表達憤怒,故此默克爾夫人急急尋求凍結「環境附加費」,希望爭回民望。
如此德國模式如果在香港出現,泛工黨唔上街瞓街示威先至奇怪,狂加電費噃,普通人要交環境附加稅,大工業唔駛,仲唔係赤裸裸官商勾結?喺香港係死罪一條!德國係民主選舉國家,執政黨有下譏院多數議員支持,可以推行如此「長期環保政策」,我地香港學人講環保,又唔肯付鈔,如兒童玩泥沙,笑話啦。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載