› 選擇地區
三藩市
紐約
洛杉磯
其他美國地區
香港 台灣 北美
 
2013年02月16日

好彩旺角不再MK - 左丁山

左丁山小時候住在洗衣街,靠父親一人薪水支持家庭,在洗衣街住板間房,及後年紀漸大,父親租多一個冷巷(房外走廊)床位俾左丁山,以免三人繼續同睡一張木板床。阿媽死慳死抵,不停到樓下附近如香海、其記、妙佳餐室搜集麵包皮,麵包邊,浸過糖,搬上天台曬到乾晒,硬晒咁,一袋一袋收起,每年兩次幫佢抬上旺角火車站搭火車返鄉下,鄉下有阿嫲與兩個家姐,在大饑荒時期,要靠食樹皮先至僥倖生存下來,阿媽抬浸糖麵包乾返去俾佢地食已經當係食禁果。點解左丁山可以出嚟香港,佢地仍然留在鄉村呢?因為阿嫲阿媽都一同意見,一定要培育家中男丁,想盡辦法帶左丁山來港,女兒可留鄉下捱苦。每諗起呢件事,就感嘆不已,因一齊玩大嘅一位同鄉男丁,冇機會來港,後來在饑荒時餓唔死,反在文革時死掉,可見命運弄人。
風水輪流轉,今時今日見到大量內地鄉下人、城鎮人來港自由行,血拼廣東道,到旺角中心排隊睇醫生,豪氣過香港人,總覺得it is long overdue,如果唔係有老毛呢隻魔鬼弄權,劉少奇鄧小平可能令到中國早十幾二十年改革開放,避免咗文革,中國死少好多人。中國富起來,人民開始有自由旅行權(仍然未夠,將來應撤銷一切出外旅遊限制,人民可完全自由來往世界各地),梗係好事,永遠不是壞事。茲有人焉,對此睇唔過眼,竟然在網上搞甚麼「光復運動」,甚麼旺角不再MK,左丁山認為完全多餘,香港從來冇資格講保護主義,不應搞保護主義,二次大戰後香港經濟飛快發展,全靠一套政府不拖後腿嘅outward looking(向外看)政策,上下以做大個餅,不以塘水滾塘魚為目標,內向內看之社會(inward looking),常懷想過去,排斥外來投資者、外來消費者,其實係失敗主義者,會累死香港,必定搞到香港逆水行舟,不進則退,被時代拋在後頭,威尼斯、利物浦、曼徹斯特皆是活生生例子。旺角過去50年不斷變化,創造流行文化,被視為香港活力之象徵,依家竟然有人嘆息旺角不再MK,講乜嘢呀,今日嘅洗衣街如果仍然係左丁山兒童時代嘅洗衣街,香港就執笠都得啦,好彩大部份香港人仍然奮勇向前,香港不再是HK!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載