蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年02月27日
馬上成為壹會員

葛師的歲月 - 左丁山

中大大師兄森哥此日巡遊到中環,首先來電通知,十分鐘後已在左丁山辦公室出現,佢話拜年毋須預約,總之大家有空便可短聚。森哥最鍾意為校友服務,為昔日師友服務,例如東院道小學(已停辦)嘅師生重聚,出版專書,搵齊霍泰輝、湯家驊、陳景生、彭玉棠、梁承達、梁柏濤等等校友名人(太多不能盡錄),佢係幕後搞手之一;中文大學海外校友系列(例如中大人在紐約、中大人在美東、中大人在溫哥華、中大人在澳洲等等)專書,佢係最重要嘅策劃人,依家仲心思思出埋一本「中大人在非洲」,以求涵蓋五大洲。今次上嚟辦公室拜年,森哥送一本葛量洪師範教育學院校友會編著嘅「葛師的歲月」,由校友會主席馮壽松,副主席李百強主編,作者甚多。左丁山與葛師毫無關係,在眾多作者之中,只係認識司徒華、郭麗英、李慶輝、杜祖貽、李百強、森哥幾位。
森哥在1957年在聯合書院畢業,同時完成葛師之一年制小學教師訓練課程,當年香港社會睇低私立大專畢業文憑,但憑羅師葛師文憑,就可以到官津小學教書,於是森哥日夜上課兼且到私立小學教書(月薪40元),苦拼到底,57年7月畢業,成身鬆晒。佢記得當時政府文員月薪270元,葛師羅師畢業生教小學就有月薪540元,經濟環境完全唔同晒,今天有青年人話香港人「身嬌肉貴」,當然係啦,佢地或者唔知道,或不願知道上一輩人幾十年前之捱世界苦拼精神咯。有人又話:「正如新加坡的年輕人也沒有興趣跟外來廉價勞工拼死拼命,去拼所謂的新加坡經濟。」梗係冇興趣啦,一位退休工程師新春期間去新加坡遊玩、打高爾夫球,佢對左丁山講,話球場上球僮係印尼人,街邊掃地係印尼人,地盤工人係印尼人,印尼為新加坡提供大量廉價勞工,新加坡啲年輕少爺千金邊度駛做喎,係正宗牛耕田,馬食穀,前人種菜後人收嘅格局,又或者係父賺錢仔享福嘅情況。如果所有年輕人都係咁,慎防坐食山崩,富無三代。森哥雖已退休,精神不減,講起年青一代教育就興致勃勃,佢話2003年香港出生人數不夠四萬七千,2011年出生人數(包括雙非,單非)有九萬五以上,幼兒院幼稚園好快就會逼爆,除咗家長頭痛之外,佢好驚聯合師弟吳克儉唔知碇,唔識得及早籌謀,到時教育局又會被人鬧餐死!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載