› 選擇地區
三藩市
紐約
洛杉磯
其他美國地區
香港 台灣 北美
 
2013年02月28日

佛教文物 - 左丁山

與律師A約吃午飯,搞咗前後一個月,大家卒之在文華酒店頂樓Pierre見面,呢度以分子食品著名,一道名菜就係鵝肝湯,點知律師A話最近喜歡食齋,雖然未完全係素食人士,唔飲鵝湯咯。佢唔制,左丁山就試吓啦。律師A家人信佛,影響所及,佢亦閱讀佛經,深感在法律界、金融界營營役役,有時碰上技術難題,傷吓腦筋,還算可以解決,但若與政治扯上關係,往往由簡單變得複雜,由複雜變成對抗陰謀,就神仙難救,在如此時刻,讀吓般若心經,反覺一切都是化外物,不必太緊張,精神開始鬆弛,血壓不會高升。
政治之事,不惹為妙,最怕政治找上頭來,欲避無從。律師A既然話喜歡食齋,左丁山雖是門外漢,介紹佢返回母校「一念素食」Bijas試吓。佢問:「邊間母校?女拔邊度會有素食?」左丁山話:「港大呀,在西部校園!」律師A又問:「港大幾時有個西部校園呀?」吓,咁都唔知,左丁山唯有扮徐詠旋,向呢位港大出身嘅律師講解西部校園一番,教佢如何到「一念素食」食齋。
隔咗兩日,著名佛教徒簡文樂自辦「皇家博物館」(Imperial Museum)在山頂纜車站聖約翰大廈一樓開幕,由民政事務局局長曾德成主持,因簡文樂係匈牙利駐港榮譽總領事,有不少外國領事到場。簡文樂係佛教文物(如沉香木觀音)發燒友,收收埋埋不知有多少,儲存在工業大廈貨倉,佢又藏有大批歐洲十七至十九世紀宮廷傢俬與飾物,有意公諸同好,於是在中環租用寫字樓,闢作博物館,分批展覽,佢話簽下一紙五年租約,租金二千萬元,但全無收入噃,咁嘅蝕本生意都肯做?簡文樂笑騎騎,勝在蝕得起,蝕得開心啫!佢着住件大紅長袍接待嘉賓,成個慈悲笑佛咁模樣,唔怪得佢隻馬叫做「伽羅」。左丁山在館內行走一遍,印象最深者就係沉香,以前未試過見到咁多沉香木雕塑。簡文樂話以前中山叫香山,東莞叫香莞,香港就係香港,根本珠三角一帶便以沉香著名,故此香港應該種多啲沉香樹,發揚本土文化。唔,中文大學近火車站就有一棵沉香樹,中貿林每次返崇基就去望一望。點解咁緊張?佢話好驚俾人偷咗去喎!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載