› 選擇地區
三藩市
紐約
洛杉磯
其他美國地區
香港 台灣 北美
 
2013年03月06日

ICC反修例 - 左丁山

二月二十五日黃昏,科威特駐港領事在香格里拉酒店舉行國慶招待會,憑請柬入場,左丁山準時前往賀慶。場內有唔少政商界人士,自不在言,點知會碰上一位非洲男士,係尼日利亞人,與佢一齊嘅係一位貌似中歐混血兒男士,自我介紹之後,互換名片,非洲人係中大地理及資源管理系副教授M,另一位男士係「中尼商企協會」會長H先生,提起「中尼貿易」,就想起好多年前香港與尼日利亞嘅貿易蓬勃,左丁山服務之銀行設立一個「尼日利亞貿易貸款部」,由一位印度人主管,專責與印度商人往來(按:港尼貿易幾乎由印度人壟斷),最初好好賺,點知後來局勢突變,不少尼商違約失蹤,銀行損失慘重,索性成個部門裁掉,現在諗起仍然替銀行肉痛。H先生話:「過往幾年中國與尼日利亞貿易增長快速,市場不容忽視。」唔,應該係嘅,總之生意有得做,但要注意風險。M教授就話希望香港人增加對尼日利亞嘅了解,歡迎香港人到當地投資,舊年佢就帶咗差不多有三十個中大學生到尼日利亞考察,學生話開了眼界,今年佢又會帶中大學生去安哥拉。真係日頭唔好講人,一講安哥拉,安哥拉總領事「鐵諾」先生就在背後出現,佢話歡迎所有人到安哥拉考察、旅遊、投資喎。
安哥拉駐港領事館設於「力寶中心」,力寶有限公司董事李澤培揸住杯橙汁行過嚟打招呼,因科威特係伊斯蘭國家,招待會不供應任何酒精飲品。李澤培話佢現在擔任國際商會──中國香港區會主席(International Chamber of Commerce),ICC最近研究過公司法修訂條例關於查冊障礙一事,認為不妥,雖然私隱幾重要,但註冊有限公司嘅董事必須為公司行為負責,公司與公司做生意,有必要瞭解對方之董事姓名地址及確定董事是誰人,才有基礎談生意,不准或嚴重阻礙公司查冊,對國際商貿構成嚴重不便。此外,非牟利慈善機構往往係註冊有限公司,如有不法之徒利用此點以非牟利機構騙捐款,可以利用新例遮掩!國際商會對新例愈睇愈唔妥,發咗一封長達四頁嘅意見函件俾陳家強,強烈反對修例,睇吓陳教授是否置諸不理啦!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載