› 選擇地區
三藩市
紐約
洛杉磯
其他美國地區
香港 台灣 北美
 
2013年03月13日

珍珠鑽石 - 左丁山

到陸羽飲茶,醫生C最後一個入座,公子L立即舉杯向佢祝賀,我地問:「賀乜嘢呀?」公子L話:「敝機構係主辦單位之一,在會展舉行嘅香港國際珠寶展每年有珠寶設計比賽,今年去到第十四屆,分公開組與學生組,醫生C太太奪公開組嘅『南洋珠』設計比賽金獎,梗係要祝賀醫生C啦!」咁又係,比賽係國際性,C太能在「南洋珠」組別脫穎而出,可喜可賀之至。C太非一般太太,自己經營珠寶設計生意,我地話醫生C賺賺埋埋,應該多啲買珍珠、鑽石、寶石俾太太設計自用!
講起珍珠,左丁山記得上星期一(三月四日)周大福招待股市分析員到葵涌參觀珠寶設計工場及皇后大道中新舖(即原屬龍子行地舖),左丁山因時間關係,冇到葵涌,只係在中午時分,加入「參觀團」到大道中第三分行「睇嘢」,只限於睇啫,因為啲珠寶鑽石價錢全部在六位數字以上,實非中產分析員所能負擔,左丁山見到在「珍珠飾櫃」有一大盤珍珠,分金珠、黑珠、白珠三類,粒粒似荔枝肉咁大粒,夠晒圓,無瑕疵,價值不菲。以此問公子L,公子L話:「珍珠之中,金珠最罕有,也最貴,周大福買珍珠,全世界都知,只向世界各大珍珠養珠場買入Top 5%,甚或更低。因為佢出得起錢,養珠場一般都會將最好嘅收成產品留低,一併賣俾周大福嘅。」唔怪得,要儲夠一打以上又圓又大嘅金珍珠,係要錢要面要耐性先至買得齊嘅。
我地成班人當日又睇埋鑽石,周大福店有一個飾櫃賣完美鑽石,所謂完美(perfect),要攞到GIA證書評分三個Excellent至得,一粒12卡鑽石首飾,光芒耀目,直情搶眼,零售價一千二百萬,本地豪門貴婦或內地豪客買咗戴上手指,出席宴會,有冇心理負擔㗎?戴出門口都驚俾人打劫啦!分析H笑左丁山:「你見得少啫,證券業界名人C太太左耳右耳戴鑽石耳環各5卡一隻,手指鑽石環係20卡,人地戴得都唔知幾自然!」唔好話C太演嘢,佢精於投資,十幾二十年前已買入鑽石,而鑽石不斷升值,佢嘅耳環、戒指已經賬面值升了不少,有得威,又賺錢,邊個夠C太咁醒。周大福嘅專家話所有鑽石產品,有雷射認證,完整電腦紀錄(由鑛場出土至零售,買家賣家全部入晒電腦),可以環球追蹤,賊贓極難出售!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載