蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年04月17日
馬上成為壹會員

勇闖韓日 - 左丁山

廿九歲仔,可以權傾一時,㩒下掣就按出一場核子大戰嘅,係邊一位?估中冇獎,當然就係北韓國家主席,黨政軍大權集於一身嘅金正恩。呢位阿哥,故意炮製一個肥大形象,向阿爺金日成看齊,會唔會刻意大飲大食,疏於運動呢,29歲人有咁肥大,其實並非健康象徵。
佢日日話要射飛彈,似乎嚇唔到人,美國、日本股市完全唔受驚嚇,升完又升,南韓亦鎮定如常,市面一啲都唔驚慌。退休賓架B吃午飯之時話:「今晚我就去首爾旅行,一早安排好㗎嘞,全團都係老友記,一致話冇有怕,只係有兩對夫婦受唔住仔女勸阻,正是老來從子,臨時退出,我地好理解嘅。」
咁勇,人地話射飛彈,佢偏偏要去飛彈襲擊目標,大家都讚賓架B好嘢。左丁山靈機一觸,立即記低佢嘅手機號碼,話如有戰事發生,會第一時間打俾佢做現場實地訪問。賓架B就認為金仔係靠嚇嘅啫,不足為懼,但金仔點解要嚇人呢?對北韓,對佢自己有乜好處?百思不得其解,只能從實際利益出發去猜度佢,估計係要在背後收取中美日韓「安撫費」,形同勒索。
外匯W等人亦唔怕飛彈襲擊,話呢個時候最好去日本,佢認為日圓必破100(老早講咗),去日本玩,此其時也。佢幾位老友如財務Y、賓架W等在復活節期間去咗名古屋打高爾夫球,在名古屋一間餐廳吃上等靚牛肉火鍋「放題」(任食),佢地吃到不亦樂乎,埋單居然係每位三千日圓,平到你唔信。日本興旺時期,日本高級行政人員飛去夏威夷打波還要便宜過在國內打波,外國人根本無法進入日本本土高球場,邊度會好似依家咁,歡迎香港人到名古屋打波㗎!賓架W話高球場經理對佢講:「尖閣列島(釣魚台)發生事故後,幾個月冇中國客,你地返到香港請美言幾句,請多啲香港人嚟光顧吓!」日本人久經不景氣,依家冇法子唔向現實低頭,渴求「強國人」到訪,唔似得我地香港咁巴閉,有聲音話限乜限物,甚至取消一簽多行!看看日本,放長眼光睇遠啲啦!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載