› 選擇地區
三藩市
紐約
洛杉磯
其他美國地區
香港 台灣 北美
 
2013年04月22日

供應大落後 - 左丁山

讀者K家住上水,常在火車站受到內地遊客擠迫困擾,睇見左丁山反對限奶令,反對反自由行,忍不住寫電郵嚟質問左丁山是否擁有店舖或連鎖店股份,昨日已經答咗佢:可惜自己冇呢。諗深一層,自己算係笨蛋,一早睇到大趨勢,又唔去買周生生與莎莎股票,失去搵錢機會,反而一位女士睇本欄(好似兩年前)講沙田第一城由置富REITs(778)接管,行將大裝修、加租,如想對沖,不妨買置富股票(即基金單位),呢位女士立即買入,依家價位升到近7.4元,每次見到碰頭,佢都多謝左丁山,可憐左丁山只擁有零單位。
2003年一月,校友地產L在校友午餐例會談及2003年投資前景,當時還未有沙士襲港,地產L大聲疾呼叫我地到銅尖旺買舖,大小不拘,之後不久,沙士將香港變成死城,地產L一啲都唔怕,繼續買舖,呢啲咪叫做投資眼光囉,2004年開始有自由行,地產L變得富上加富,我地還是不富,唔恨得咁多咯。
2004年之後,其實舖租及舖價未直線上升,香港零售總額在1997年創下高峯,2003年跌到谷底,有咗自由行,2007年零售額破1997紀錄之後,至2010年增長唔算好多,但2010年增長18%,2011年增長25%,2012年增長10%,三年間共增長53%之多,零售總值在2012年高達4454億元,咁就帶動遊客區地舖租金瘋狂,升完又升。道理一字咁淺啫,睇吓同期之私人商業空間數字,2009年至2012年之間只係增加咗1%咁大把咋!
創辦「黃金十年」嘅林奮強最近公開講過以上數字之後,同我地吃晚飯,指出本港通脹未必可以怪責美元貶值,輸入通脹,本地通脹主要係本地供應不足所造成,租金上升就係供應不足之反映。香港勞工供應短缺,但不准輸入外勞,香港目前失業率係3.5%,總就業量已經創下歷史新高(372萬人),過往三年家庭入息中位數增加20%,簡單講句,做工人數多咗,收入多咗,遊客多咗,於是零售額自然增加,偏偏商場店舖數量面積冇升到,租金唔升至奇!解決方法只有一個,就係盡快增加供應,增加商店商場數目,否則通脹無法解決,商舖租金難以回落。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載