› 選擇地區
三藩市
紐約
洛杉磯
其他美國地區
香港 台灣 北美
 
2013年07月17日

香港落後新加坡? - 左丁山

明明係講發展新界東北,點知道反對發展人士以及泛民議員范國威、張超雄將反對焦點改為收回粉嶺高爾夫球場,變成富豪球會與村民(未必係原居民)土地之爭,富豪與非富翁(未必係窮人)之矛盾,一場開發新市鎮嘅規劃辯論,竟然轉化成為階級土地之爭,充份反映咗今日香港,高度分化,令人聞到恍如六十年前共產黨在中國農村發動農民鬥地主嘅味道。泛民議員一方面爭取民主,另方面大搞共產主義方式鬥爭,意圖提前赤化香港,慎防點火玩出火,如伊利沙伯中學營火會。
「明報」在七月十日A2版大字標題:「星洲收高球場建屋,『港再落後』」,標題極驚嚇人,但內文就話明今年一月新加坡國家發展局發表2030年土地規劃大綱報告(注意,係2030年),內容則指可能整合佔用廣大面積之土地例如軍事訓練、高爾夫球場及農業(farming),以作其他用途。
香港反對東北發展之人士亦是「農業保護派」,指香港需要發展農業,保留新界農村,依此說法,新加坡政府要發展農地,香港反對派點會贊成呀?但《明報》就好嘢嘞,大字標題講星洲收高球場建屋,對回收農地建屋就眼大大睇唔見,當讀者唔識英文咩。新加坡政府務實到得人驚,香港特區政府永遠無法去學,譬如為咗興建商場、賭場及寫字樓,新加坡大規模填海,根本上話填就填,點會無端端走出個Y婆婆申請法援嚟司法覆核吖?新加坡移山亦唔見有綠色X、綠色Y之類嘅團體去反對填海噃,與香港情況大大不同,事實上,環保團體好懂得欺善怕惡,唔會在新加坡聲大大為咗一啲魚、一啲蝦來與新加坡政府搞對抗嘅。
據「明報」資料,新加坡土地面積716平方公里,等於香港面積1104平方公里之64.8%,新加坡有高球場18個,佔地1500公頃(15平方公里),高球場面積等於新加坡總面積之2.09%,香港有6個高球場,佔地698公頃,等於總面積之0.62%,與新加坡相差甚遠,故此新加坡如果收回高球場起屋輕而易舉,一個國家用2%土地去做高球場,實在太奢侈啫,睇呢啲數字,香港使乜怕落後於新加坡喎!「明報」不必借新加坡嚟單打特區政府。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載