› 選擇地區
三藩市
紐約
洛杉磯
其他美國地區
香港 台灣 北美
 
2013年07月29日

放生薄熙來 - 左丁山

一間藥廠(GSK)為何由2007年起至今,經由一間上海旅行社代辦會議(conventions and conferences)而動用五億美元咁多錢,令人難以理解。科技F在上海北京工作過幾年,本人又係內地大學畢業生,對內地嘅了解,比我地「深層一啲」,就唔覺得奇怪,所以佢嘆息話:「我一啲留學海外嘅海歸派同學在本地大學教書,成日話本港學生不了解國情,不知道建國史,返大陸工作好吃虧。冇錯,香港學生大多對中國歷史、政治矇查查,但如果佢地真係深入了解國情及黨內有派,派內有系嘅複雜關係,以至到開會用五億美金嘅幕後情況,可能嚇到唔敢返大陸工作㖭。」
識得甚麼派系,或可了解新情況,七月八日,北京法院一審,宣判前鐵道部部長劉志軍受賄六千四百餘萬人民幣,以三點理由(積極退贓,如實交代案情,有悔意),判處劉志軍死刑,緩期兩年執行,剝奪政治權利,沒收個人(注意:係個人)全部財產。實質上,劉志軍即係兩年內如不犯事,便改為無期徒刑,咁上下就可以申請保外就醫,即是「被放生」。
胡溫時代拉劉志軍下馬,鐵路建設下馬,到咗習李上台,法庭判案從輕發落,李克強發表指示:「鐵路還是要建的」(立即刺激七月二十三日鐵路基建股急升),一朝天子一朝臣,此之謂也。況且在七月二十六日發佈薄熙來案預定在八月間在濟南市中級人民法院開審,只控三條罪:(一)涉嫌受賄(傳說逾二千萬元人民幣),(二)貪污(傳說)逾五百萬,(三)濫用職權。淨係睇呢三條罪,已知薄熙來將來判刑不會嚴厲過劉志軍,其他谷開來涉嫌殺人、王立軍入美領事館等等,一切與薄無關,胡溫倒薄,又係雷聲大雨點小!資深中國看門人(觀察家China Watcher)L君叫左丁山留意埋七月二十二日報紙上報導,江澤民於七月九日在上海西郊賓館會見基辛格兒孫三代人嘅消息,係由中國外交部網站頭條發放嘅,高調得不尋常,何況主要係報導江澤民大力挺習,讚揚習近平係一位強而有力嘅領袖!L君猜測:「江派習派已經達成共識,以後和平共處,齊齊雙贏,江派大將周永康已再度露面咯,表示薄熙來可能被放生,如再打貪,當殃者會係其他派系人物!」

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載