› 選擇地區
三藩市
紐約
洛杉磯
其他美國地區
香港 台灣 北美
 
2013年07月30日

收集學位  - 左丁山

縱橫金融界多年嘅財經怪傑L突然來電話要請食飯,就到佢嘅飯堂「名人坊」(九如坊一間酒店內),上到去,喼頓已經叫定:「左先生,博士等緊你。」博士?邊位博士呀,竟然就係財經L,大家相識多年,何須客氣,直問:「你當年在中大讀MBA冇畢業,依家係甚麼博士?」財經L哈哈一笑,遞上名片,其實佢已退休做閒雲野鶴,只是做吓INED(獨立非執董)過吓日辰啫,佢間公司在長沙灣,但以「名人坊」為飯堂,可知佢幾咁得閒。一睇名片,真係唔得掂,字母銜頭多到數唔晒,包括香港理工大學PhD,澳洲Curtin大學DBA,中大理學碩士,科大碩士,城大碩士,公開大學MBA,還有ACIS,FCCA,CPA等等,一個字母收一萬蚊人工一個月都唔得掂。
於是立即改稱佢做博士L,以示尊敬,再問佢:「讀埋咁多學位做乜?」博士L答:「讀開有癮吖嘛,我讀過咁多商業財經學位,理工大學酒店學博士都讀埋,現在仍然繼續讀,讀嘅係西方哲學,洋教授對我講過叔本華,尼采,黑格爾,康德,讀得好辛苦,哲學家思維與商業、經濟專家大大不同,我正在思考尼采嘅『超越昇華』,『上帝已死』,叔本華嘅『人與人之間的相處,相當於狼與狼的關係……』」呢樣真係諗佢唔到,從來一身銅臭,並以此為榮,不怕與他人爭論金錢重要性之財經人物,竟然同左丁山講尼采、叔本華,好彩當年年青時偶有涉獵,不致一無所知,可以同佢講番幾分鐘,笑佢:「你鍾意叔本華講女人與性啫啩?」博士L話:「叔本華話性係人與人之間嘅核心關係,我好信服呀。但最近洋教授講佔領中環,我起初極為反感,指佢煽動破壞,不過佢由馬丁路德金民權運動,公民抗命講起,講到最收尾,我開始唔抗拒佔中,咪等班民主派佔中,出吓聲,出吓氣囉,政府不須反應過敏,我唔會參加佔中嘅,但依家唔再抗拒!」讀哲學竟有如此魅力,真想唔到,上一位朋友讀埋博士碩士共七、八個學位嘅係已故嘅伍達倫博士,伍博士成個讀書人咁款,所有朋友都信佢真心讀書,視之為興趣。博士L成個搵銀打仔格,點會信佢係讀書人呀,但佢又的確收集碩士學位如收集郵票咁輕鬆,讀書考試如此有天份,唔到左丁山唔服。講哲學講咗一輪,先至醒起,午飯主題曲係乜?博士L慢條斯理話:「嗱,有一間公司咁咁咁……」回歸搵銀大前提,左丁山為之打醒精神。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載