› 選擇地區
三藩市
紐約
洛杉磯
其他美國地區
香港 台灣 北美
 
2013年08月06日

人造草皮有害 - 左丁山

康文署唔識鋪草,養草,管理草場,為官者不懂,管理人員似乎做又36,唔做又36,年年等公僕加薪,落大雨都唔識用透明膠布鋪滿球場嚟保護草皮,好令人失望。近年康文署大概對自然草冇晒符,改以人造草代替,跑馬地馬場中場內之球場已逐漸用人造草場完全代替自然草。一啲體育專家如浸會大學體育系劉永松在now電視台「時事全方位」節目,大讚人造草場易打理,應該推廣。
體育專家如此講,康文署相信更振振有辭。左丁山問新亞大師兄李賢祉博士人造草場是否係自然草之良好代替品?李博士嗤之以鼻,指係亂噏。第一點,人造草係化學產品,由回收廢輪胎改造而成,第一代、第二代人造草好唔掂,現在已出到第三代,用化學方法造出人造草,本身已經唔環保,對環境有害;第二點,因人造草有化學氣味,一啲對氣味敏感嘅球員在球場踢完波之後,會出現皮膚痕癢,呼吸系統出毛病嘅現象,在人造草場運動反而傷害身體;第三點,現代新款足球鞋越來越薄,球員在人造草場踢波走動,腳底容易生水泡,對球員不利。
人造草場只係懶人方法,完全沒有自然草保護球員身體及器官嘅效果,康文署大力推動人造草場,據李賢祉博士嘅意見,乃係缺乏知識!
真令人氣餒,康文署負責管理全港花草樹木及球場草皮,竟然缺乏專業知識,死未!香港街頭樹木大多數又瘦又矮(戰前種下嘅樹木除外),一位園藝專家向左丁山呻過,香港種樹有好多限制,出發點皆係行人安全與法律責任,譬如果樹不能種,以免路人抓樹摘果;多葉樹不能種,以免打風掃落葉塞坑渠……佢一口氣講咗好多理由,左丁山聽到昏了,冇法子記得咁多。算了吧,街頭少樹木咪方便食環署清潔打理囉,况且一下唔覺意種下一棵大樹之後,就要受管制不能輕舉妄動,故此左丁山聽過,有人植樹多年後發覺樹幹直徑有可能大到法定範圍(即再大啲就不能斬),連忙一斬了之,以免他日唔斬得,凡之種種,一介草民那能明白咁多。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載