› 選擇地區
三藩市
紐約
洛杉磯
其他美國地區
香港 台灣 北美
 
2013年08月10日

時止則止時行則行 - 左丁山

因發展局局長陳茂波在立法會引用新亞校歌,好多人討論及之,崇基哲學系校友梁文道頂唔順啲新亞仔女多情,也寫吓崇基校歌,中國基督教大學嘅校歌樂曲,首首相同,歌詞各異,左丁山參加過一次全國基督教大學同學會周年餐會,每間大學代表進場,都高唱校歌,聽咗幾首,就知道同出一源。不過1949年之前嘅中國基督教大學畢業生,最年輕嗰位就係在1949年畢業嘅,今年起碼85歲咯,校友越來越少,將來只可能由香港嘅浸大,嶺大與崇基校友代表晒。
聯合書院大師兄森哥唔抵得,叫左丁山寫吓聯合書院校歌(現稱院歌),森哥話聯合書院院歌由Susan Tan作曲,國學大師/聯合中文系教授陳湛銓填詞。Susan Tan不知何許人也,只知係一位著名南洋僑領陳蘭芳先生之女兒,但事蹟已不可考,各位讀者如果有人知道陳蘭芳與其女兒Susan Tan之生平,請不吝指教。至於陳湛銓先生(1916-1986),大名鼎鼎,上世紀八十年代之前,長期在大會堂高座主持學海書樓講座,講授周易、詩詞、古典文學、諸子百家雜說等等,影響及不少青年學生。明德學院中文教授鄧昭祺本是醫生,公餘到大會堂聽學海書樓,聽陳湛銓聽到入迷,毅然走返港大再入讀中文系,成為中文系教授,放棄醫生專業,可知陳湛銓先生之講書功力!至於佢位姪孫,以前叫Tony,現在叫Peter,不談也罷!
聯合書院院歌歌詞如下:
「我校聯合,氣象萬千,集義斯大,謂金非堅。義與人同,才由學廣,識古知今,開來繼往。明德自馨,新民存誠。時止則止,時行則行。浩浩青天,昭昭白日。爾式爾瞻,唯精唯一。」格式與中華民國國歌一樣,特別係其中兩句:浩浩青天,昭昭白日,似有所指。
YouTube有中大合唱團嘅演唱版本,歌聲幾雄壯㗎。
對於波叔在立法會聲言不辭職,自許「艱險我奮進,困乏我多情」,森哥話希望波叔能夠明白「時止則止,時行則行」嘅道理,仔細研究吓,佢對波叔有過好印象,但做人做官要懂得時行則行、時止則止喎。呢兩句出自易經艮卦。艮,止也,時止則止,時行則行,動靜不失其時,其道光明。呢番道理,普通人不易明白,希望局長能平心養氣,體會森哥贈送歌詞兩句之苦心!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載