› 選擇地區
三藩市
紐約
洛杉磯
其他美國地區
香港 台灣 北美
 
2013年08月12日

赤柱興建停車場 - 左丁山

一位美國朋友幾年前賣掉山頂住宅單位,到赤柱買咗一間屋,還有餘錢為一仔一女分別在中半山分別買入住宅單位,解決了一家四口之獨立居住問題,梗係開心啦。不過最近佢與赤柱一班外籍居民就好唔開心喎,因為早上到中環返工,塞車塞到失魂,香港仔隧道就如二十幾年前嘅獅子山隧道,早上行不得也哥哥,到咗星期六日,平時幾清靜嘅赤柱就有大量「香港人遊客」入侵,大把車輛殺到,把赤柱塞到水洩不通,出入困難,加上赤柱停車場少,只有一個「史丹利廣場」停車場,啲車無處可擺,唔知點算。
最近呢位美國朋友S得悉政府可能重提舊事,要在赤柱灘道(近沙灘)興建一個多層停車場,有150個車位,朋友S當堂彈起,認為由星期一至五,赤柱根本唔需要停車場,一年之中,停車場只會有百零日有用,根本係浪費公帑,兼且在狹窄道路起停車場,會令赤柱灘道,赤柱村道擠塞到不得了,赤柱居民更加不便。於是朋友S想話發動抗議,但本地人區議員反應冷淡,商戶需要遊客生意,亦唔理睬,朋友S問左丁山點辦,左丁山笑曰:「咪好似其他地區居民咁樣,由你組織所有赤柱洋人居民在星期六日,穿泳褲、比堅尼上街示威,阻塞赤柱灘道,高叫示威抗議囉,如果赤柱全部洋人西婦都揸住英文示威牌上街,事先通知CNN、BBC,可能會成為世界趣聞㖭,令運房局局長張炳良受吓國際壓力都好呀!」
朋友S話:「得唔得㗎,我地猛咁寫信俾立法會議員及區議員咯喎?」今時今日,寫鷄腸信俾議員有鬼用咩,田北辰都話過,邊位絕食邊位就惡啲吖嗎,朋友S大可搵兩位肥胖洋人在赤柱灘道靜坐絕食抗議,無論成功與否都可達到若干瘦身效果!
記者小G亦住在赤柱,不過係住在無敵海景居屋,佢話每逢陽光普照嘅周末,佢就皺眉頭,因為外來遊客擠滿赤柱大小餐廳,令佢與老公無處落腳,產生有反對「香港人到赤柱自由行」嘅衝動!冇法啦,香港比較好嘅沙灘全部位於港島南區,偏偏南區沙灘地段道路最為狹窄,難有地鐵通車,冇得搞!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載