› 選擇地區
三藩市
紐約
洛杉磯
其他美國地區
香港 台灣 北美
 
2013年08月13日

官員申報利益 - 左丁山

政府公佈一份新嘅「利益申報指引」,看似公平,但其中一條其實好難執行,如果強要推行,所有商界、學界人物以後可以同政府講聲拜拜,所謂政治任命,問責制名存實亡。
呢條就係:「政治委任官員的私人利益,包括官員本人,其家人、親屬或私交好友、所屬會所和協會的經濟和其他利益。」
「私人利益不止包括金錢利益,亦包括官員與親屬或友好的聯繫,或其他交往或效忠,當中儘管不涉及經濟利益,但可左右官員在執行職務時所作的判斷,或令人有理由相信會影響其判斷。」
香港有一個其他大國沒有嘅特殊現實,就係高官與商界高層來源狹窄,高官之中,冇八成都有七成係來自本地兩間大學嘅,港大第一,中大第二,財經工商界高層人物亦然,近十年香港多咗好多回流留學生,佢地升遷迅速,但因為年資比較短,十年八年內未必可以取代港大中大生之地位。好嘞,大家試數吓,現任司長局長一共十五人,就有八位港大校友,兩位中大校友,佢地土生土長,有不少中學大學同學,中間難道冇一位好友?除非佢地唔認嘅箒,如果申報利益之時,要申報埋好友,所屬會所及協會嘅利益,簡直搵嚟講。舉一個舊例,董建華特首嘅問責官員之中,有梁錦松、馬時亨、葉澍堃三位根本就係港大1973主修經濟嘅同班同學,佢地嘅大學友好就有張永霖、張永森兄弟,國泰傳訊總經理黃嘉倫(現已退休),德意志銀行香港行長羅志偉等等,如果2002年之時有上述申報要求,都唔知要幾多張紙嚟填寫,而且佢地嘅好友嘅利益,佢地都未必知嘅。
申報直系親屬嘅利益,無可厚非,但如果親屬包括埋四代姑表,攞嚟講嘅箒,例如李國寶家族(李家)在香港顯赫近一百年,李國能如做大官,要填報埋李國寶嘅利益所在?簡直攞嚟講,李國章又如何知道李福兆嘅資產利益呀?有咗呢份指引,商界人物千祈唔好加入政府,視左丁山為好友之中大校友及友人,如果你地加入政府,大家要講一句:「我同你唔係幾熟嘅咋!」

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載