› 選擇地區
三藩市
紐約
洛杉磯
其他美國地區
香港 台灣 北美
 
2013年08月15日

女教師罵街 - 左丁山

女教師在街頭講粗口事件,左丁山一路未睇過YouTube版本,不知實情如何,直至星期日,小記者L將所有佢搵到嘅YouTube女教師講粗口錄影全部傳送過嚟,星期日下午冇馬跑,比較得閒,於是睇咗十幾分鐘,印象係呢位教師當日表現得勇猛驚人,又惡又辣,既問候娘親(×你老母)又指男女警察係八公、八婆、賤人,鬧警察係公安已係比較斯文,當然仲有一句現在已經聞名全港嘅WTF,但左丁山聽到佢帶有s音,應該係衝口而出,講咗What's The F。WTF與WsTF應該有小小分別嘅,WTF係粗言,未必係粗口,就正如昔年在大球場睇南華對精工,胡國雄交腳靚波俾居理入攝單刀,點知居理一腳打飛機,全場四萬球迷大合唱「調」(調整個調,高音)一聲咁箒。但講What's The F,咁就有考究咯噃,可能有好多種形式嘅嗎(以下刪數十字)。
如此街頭鬥士竟然曾經攞過卓越教學獎,實在令人意想不到,為何如此?年青時上訓練課程,導師(tutor)上tutorial,先俾我地一班十幾人睇一張照片,係黑人打白人,導師話:「是否一張圖片勝過一千字報導,討論之?」大家發言,角度多籮籮,勉強達成結論係黑人唔啱,然後導師再顯示一張「前傳照片」,係同一白人打同一黑人,跟住係一張「後傳照片」,係白人與黑人群毆,導師話:「單睇一張照片就下結論,往往有偏差,千祈唔好睇到一張單一圖片就下結論,要首先追查前因後果」。現在科技進步,圖片造假,容易到極,我地更加唔好相信報紙一兩張圖片所傳遞嘅信息。比圖片更進一步,YouTube上「新聞性影片」是否就包含「前因後果,前文後理」?值得懷疑。但呢位女教師嘅形象在YouTube上就真係得人驚到極,佢嘅擁躉大概要放番一段十五至二十分鐘嘅「完整版本」上YouTube(如果有嘅話)至可以為佢洗脫惡死女教師之嫌疑。
香港人本已戾氣盛,現有逐漸形成泰國式黃衫對紅衫之勢,為政者應該設法降溫才是,女教師已向公眾道歉(未向受佢辱罵之警察道歉),教育局長吳克儉想話大事化小,克制地講事情告一段落,點知梁特首撥火,驚死件事沉寂下來,要吳克儉交報告,佢究竟想點呀?

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載