› 選擇地區
三藩市
紐約
洛杉磯
其他美國地區
香港 台灣 北美
 
2013年08月22日

節能比賽 - 左丁山

左丁山可以講得係食中電奶水大嘅,先父在中電工作40年,直至退休,一生只做一份工,憑微薄薪水,可以在洗衣街唐樓租一間板間房及一張冷巷床位上格(上格租金貴啲㗎)俾左丁山讀書瞓覺,左丁山就是如此由小學讀到中學大學,直至有工做,結婚嘞,先至到沙田村屋租一間梗房,告別冷巷床位生涯,可以講,若無父親之中電薪水支持,左丁山之學生生活就會完全不一樣。
近月天氣不是太熱,就是大雨不止,屋企冇法子唔開冷氣,否則會熱死或焗死,冷氣開得多,電費自然多,自己又唔係黃錦星、盧冠廷咁款嘅環保聖人,點可以忍受冇冷氣之苦呀,但又幾覺得自己應該節能省電噃,於是問吓中電莊偉茵有乜辦法?莊師妹(聯合政政系)話:「將冷氣溫度調高一度,就可以省電,如只開一部客廳冷氣、飯廳唔開,加開一把風扇箒,亦可慳電,如果你想知多啲,中電可以派人上門教你如何節能慳電,裝置智能電錶,中電網上還有能源計算機及碳排計算機……」聽住咁多先,立即採取新政,客廳飯廳冷氣機輪流開,出動一把電風扇,希望可以減少每年高𥧌用電時期(八月至十月)嘅電費,其他如隨手熄厠所燈,不在話下。後來在一份免費報紙睇到一篇文章,作者好似係大學教授,專講環保節能,佢話智能電錶唔係唔好,但因為「智能」,電腦紀錄齊備,中電可以知道晒府上全日用電高𥧌低谷一切情況,私隱就差啲咯。
唉,又多一個私隱問題要諗,睇完文章,見到霍士電視台講一個美國人家庭嘅家庭電腦系統被黑客無故入侵,透過Web Cam向Web Cam監控嘅幼兒大講色情故事,嚇到佢連忙清拆一切家中監控設備──總之屋企愈多智能電腦設施,就愈容易俾壞人入侵家庭生活圈子啦。莊師妹話中電搞緊一個「齊齊慳出個未來」節能比賽(八月一日至九月三十日),上網www.clponline.com.hk/eo即可報名參加,住宅客戶在兩個月內盡量慳電,與去年同期比較,慳電百分比最高嘅住戶就可贏到電費回贈,禮券一萬元等等獎品!
(訂正:昨日本欄寫「Promise Hong Kong Save Energy 10%……以達致每年節省能源百分之十」,實乃「Promise Hong Kong Save Energy 1%……以達致每年節省能源百分之一」,手民之誤,謹此致歉。)

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載