› 選擇地區
三藩市
紐約
洛杉磯
其他美國地區
香港 台灣 北美
 
2013年08月28日

兼職國家 - 左丁山

美國可能係全世界最多律師嘅一個國家,所以打官司比例特別高,乜嘢事都可以告一餐,博得到大公司賠償就發達。美國文科、社會科學院畢業生,好多時都攻讀法律學位(按:美國本科課程無法律系,法律學位屬研究院課程,學生必須已擁有學士學位),肥仔K在大學主修政治,一入學,系輔導主任已教佢如何選讀一啲他日有利於報考法學院嘅科目,讀政治其實係為將來讀法律,做律師準備。
讀法學院需時三年,學費又貴,孭到一身債,全靠畢業後搵到高薪厚職嚟還債,例如一間美國律師行(K&L Gates,即蓋茨父親之律師行),有一位南亞裔律師Navin Kumar Aggarwal,47歲,最近被控為償還賭債,偷盜客戶5.7億元,被判囚12年,呢位律師曾經試過年薪超過一百萬美元㗎。可惜呢,現在美國經濟不景,大企業唔願請人,新律師就冇啖好食。霍士電視台訪問咗未夠三十歲嘅一批MBA、律師,佢地話搵工艱難,年青男律師話佢已算有運,在紐約大律師樓搵到一份工,但唔可以簽長約,只算係長散工,除薪水外,全無公司福利(包括醫療保險),但佢所做嘅工作,與舊人律師完全一樣,但律師樓就是不願意聘請佢為正式員工。
為何如此,睇上星期「經濟學人」一篇報導就有答案。呢篇文章講奧巴馬總統視ObamaCare(奧巴馬保健法案)為名留青史之作,全力推行,內有一條規定,美國所有企業,如有50名或以上嘅全職員工(full time employees),一定要為員工購買可負擔的醫療保險,否則罰款,每一名員工計,罰款二千至三千美元。既有如此規則,幾乎所有中小企立即大規模裁減全職員工至四十九人或以下,其他員工全部係兼職。唔怪得現在美國每次宣佈就業數據時,失業率雖有下降跡象,但part-time工人數字不斷增加,此亦解釋得到點解我地解讀美國零售數據時,汽車及家居用品銷量上升,但沃爾瑪、Target、 Macy's呢啲零售店就停滯不前,兼職人士有工做,需要換車為屋企裝修吓,但買衫買鞋,出外飲食就盡量節儉咯。ObamaCare令美國成為一個兼職國家,基層工人無財政安全感,焉敢盡情消費,故此美國經濟復甦,每每行前一步就退後半步。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載