› 選擇地區
三藩市
紐約
洛杉磯
其他美國地區
香港 台灣 北美
 
2013年09月01日

醫學院風雲 - 左丁山

估唔到突然之間,香港兩間大學嘅醫學院同時出現於港聞版,港大醫學院係舊聞翻炒,無風起浪,中大醫學院就出現疑似人事擺不平嘅吵鬧,俾威爾斯醫院拖埋落水,有理說不清。
香港大學在2005年接受李嘉誠基金會捐款十億,將醫學院命名為「李嘉誠醫學院」,本屬平常,在美國閒過立秋,不少著名大學醫學院就以捐款人命名,例如芝加哥大學有Pritzker School of Medicine,長春藤大學康奈爾有Weill Cornell Medical College,布朗大學有The Warren Alpert Medical School,加州大學洛杉磯分校UCLA有David Geffen School Of Medicine,達茅夫學院有Geisel School of Medicine等等,呢啲大學歷史之長,比港大有過之而無不及,赫赫有名,港大接受捐款而將醫學院改名,無非與世界一流學府看齊而已,無甚大不了。為此而感到不爽,至今喋喋不休者,眼光不出鯉魚門。
至於捐款分期交付,亦非奇怪,特別係針對香港特區政府之配對捐款,捐十億分十年收取,連埋配對得益,最少可收足十五億,港大何樂而不為,駛乜一年就收晒擠出其他熱心捐款人?2005年之時,馮國經博士係港大校務委員會主席,呢位哈佛商學院博士、哈佛商學院助理教授、利豐集團主席,乃係世界級商人,同徐立之校長度出分期收款之計,全係為香港大學最佳利益設想。李嘉誠基金會嘅聲明話一切付款辦法係依足港大建議,以配合大學爭取配對資助的需要,唔該一啲無知評論員睇真啲。
至於中大心臟科教授余卓文「封刀之事」,內裏應有原因,余教授身為手術小組組長,領導小組工作,何解會被所有組員醫生一齊具名投訴?以壹仔肥佬黎領導作風,如有編輯俾七位記者一齊投訴嘅話,必炒編輯無疑,唔駛解釋㖭。醫學院顧大學名譽,醫院顧病人安危,余教授除非有好強烈證據證明自己全無違規,都係收聲比較着數,但既有報導話佢已向中大校董會主席投訴中大校長行為不當,加上醫管局介入調查,事情或會搞大,唔通要法庭相見?

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載